ՀՀ սփյուռքի նախարարն ընդունեց Ցվետանա Պասկալևային

Մարտի 16-ին ՀՀ սփյուռքի նախարար Հրանուշ Հակոբյանն ընդունեց բուլղարուհի կինոռեժիսոր, Արցախյան ազատամարտի տարեգիր Ցվետանա Պասկալևային և «Armenian music center»-ի տնօրեն Սամվել Ամիրաղյանին:

Հյուրերը նախարարին պատմեցին Արցախյան գոյամարտին նվիրված իրենց ֆիլմերի՝ Հունաստանում, Կիպրոսում, Բուլղարիայում և Լիբանանում կայացած շնորհանդեսների մասին: Տպավորությունները հատկապես վառ էին Մեծի Տանն Կիլիկիո Արամ Ա Կաթողիկոսի ընդունելությունից և ոչ միայն նրա համար, որ վեհափառը նրան պարգևատրել էր «Մեսրոպ Մաշտոց» մեդալով:

Շնորհանդեսը մեծ շուքով էր անցել նաև Ցվետանայի հայրենիքում՝ Բուլղարիայում: Հատկանշական է, որ Արցախյան գոյամարտին նվիրված ֆիլմերի շնորհանդեսը առավել բուռն արձագանք էր ստացել մարտի 3-ին՝ թուրքական լծից բուլղար ժողովրդի ազատագրման օրը:

Ցվետանա Պասկալևան մեր մարտիկների հետ անցել է պատերազմի բոլոր արահետներով, երկու անգամ վիրավորվել է... և որպես միջազգային լրագրող կարողացել է ճեղքել Արցախի տեղեկատվական շրջափակումը:

Հիշեցնենք, որ 1991թ. մայիսից նա փաստագրական 7 ֆիլմ է նկարահանել Լեռնային Ղարաբաղի մասին՝ «Բարձունքներ, հույսեր» (1991թ.), «Կբացվի՞ արդյոք առավոտը Ղարաբաղում» (1992թ.), «Իմ թանկագին ողջեր ու մեռածներ» (1993թ.), «Ղարաբաղի վերքերը» (1994), «Իրենց հողի զինվորները» (1994), «Լռություն» (1995թ.), «Հավատ ու ոգի»՝ Շուշիի գրավման մասին (2001թ): Ֆիլմերը թողարկվել են վեց լեզուներով՝ հայերեն, ռուսերեն, անգլերեն, ֆրանսերեն, իսպաներեն և բուլղարերեն:

Բուլղարացի ռեժիսոր Ցվետանա Պասկալևային շնորհվել է ՀԲԸՄ «Կարպիս Փափազեան» ամենամյա մրցանակը՝ «Արցախահայության պայքարի ճշմարտացի և ամբողջական լուսաբանման իր քաջության, ինչպես նաև Հայաստանին իր անմնացորդ նվիրվածության համար»։

Ներկաները քննարկեցին ՀՀ սփյուռքի նախարարության հետ համագործակցության հնարավոր ուղիները՝ ֆիլմաշարը միջազգային հանրությանը պատշաճ ներկայացնելու համար, ֆիլմաշար, որը փաստագրական իրականությունն է Ղարաբաղի գոյամարտի՝ պատրաստված բուլղարուհու կողմից: