Մինսկի Խմբի համանախագահներն ամփոփել են անցնող բանակցային տարին

ԵԱՀԿ վիլնյուսյան գագաթաժողովին ընդառաջ, ԵԱՀԿ Մինսկի խմբի համանախագահներ Բեռնար Ֆասիեն (Ֆրանսիա), Ռոբերտ Բրադկեն (ԱՄՆ), Իգոր Պոպովը (Ռուսաստան) եւ ԵԱՀԿ գործող նախագահի անձնական ներկայացուցիչ Անջեյ Կասպրշիկը ԵԱՀԿ Մշտական խորհրդին ներկայացրել են իրենց տարեկան զեկույցը: Այս մասին տեղեկացնում են ԵԱՀԿ մամլո ծառայությունից:

Ամփոփելով Լեռնային Ղարաբաղի հակամարտության խաղաղ եւ տեւական կարգավորման գործընթացում իրենց միջնորդությունը\' համանախագահները նշել են, որ անցած տարվա ընթացքում տարածաշրջան այցելել են 8 անգամ եւ 14 առանձին հանդիպումներ են ունեցել ՀՀ նախագահ Սերժ Սարգսյանի եւ Ադրբեջանի նախագահ Իլհամ Ալիեւի հետ: Անցած 14 ամիսների ընթացքում համանախագահները ոտքով հատել են շփման գիծը 4 անգամ\' ցույց տալով, որ այդ գիծը հավերժական արգելք չէ տարածաշրջանի ժողովուրդների համար, եւ որ հրադադարի իրականացման ռազմական կոորդինացիան հնարավոր է բոլոր կողմերից կամքի դրսեւորման պարագայում:

Ընդգծելով իրենց երեք երկրների ամենաբարձր մակարդակով ներգրավվածությունը հարցի կարգավորման մեջ\' համանախագահները կրկին շեշտում են, որ խնդիրը ռազմական լուծում չունի, եւ որ կողմերի քաղաքական կամքը խիստ կարեւոր է դժվար որոշումներ կայացնելու գործում\' անընդունելի ստատուս-քվոն փոփոխելու եւ խաղաղության հասնելու համար: Նրանք նաեւ նկարագրել են այն հավելյալ ջանքերը, որոնք ներդրվում են բանակցային մթնոլորտը բարելավելու, հրադադարն ամրապնդլելու եւ տարածաշրջանի ժողովուրդների միջեւ փոխըմբռնումն առաջ մղելու համար: Համանախագահները ծրագրում են այցելել տարածաշրջան այս ամսվա վերջին\' զարգացնելու համար իրենց ներկայացրած առաջարկները եւ բանակցային գործընթացի շարունակականության վերաբերյալ քննարկումներ անցկացնելու նպատակով: