Ինչո՞ւ են Ղարաբաղյան հարցի շուրջ անդրադարձներն ակտիվացել

Վերջին շրջանում միջազգային հանրությունը կրկին ակտիվորեն անդրադառնում է Լեռնային Ղարաբաղի հակամարտության խաղաղ կարգավորման հարցին: Մասնավորապես՝ Հայաստան կատարած այցի ժամանակ Գերմանիայի արտգործնախարար Գուիդո Վեստերվելլեն ասել էր, որ ԼՂ հակամարտության ստատուս քվոն չի կարող երկարաձգվել: Ավելի վաղ հակամարտությանն էր անդրադարձել նաև Ռուսաստանի Դաշնային խորհրդի նախագահ Վալենտինա Մատվիենկոն, որն ասել էր. «Ղարաբաղյան հակամարտության կարգավորումը հեշտ գործընթաց չէ, և հիմնական առաջադրանքը խաղաղ ճանապարհով հակամարտության կարգավորմանը հասնելն է»: Խնդրին անդրադարձել էր նաև ԱՄՆ Պետդեպը, որը վերստին կարծիք էր հայտնել, որ ղարաբաղյան հարցը ռազմական լուծում չունի:

Լուրեր.com-ն այս առնչությամբ մեկնաբանություն խնդրեց ՀԱԿ արտաքին հարաբերությունների հանձնաժողովի ներկայացուցիչ Վլադիմիր Կարապետյանից: Վերջինս մեզ հետ զրույցում ասաց, որ այս ակտիվությունը  չի պայմանավորում հենց գործընթացի բուն ակտիվացման հետ: «Քանի որ ես որևէ ակտիվացում կարգավորման գործընթացում չեմ տեսնում, ես չեմ պայմանավորում այս հայտարարությունները, անդրադարձները հենց գործընթացի բուն ակտիվացման հետ: Կարծում եմ պարզապես միջազգային հանրության ուշադրությունն են ուզում հրավիրել գործընթացին: Այսինքն՝ ուշադրությունը որպես սառած կոնֆլիկտի, որպեսզի տպավորություն չստեղծվի, որ կարող է այդ խնդիրը մոռացության տրվի: Կարծում եմ՝ պարզապես դրանով է պայմանավորված: Որևէ կոնկրետ բանակցային գործընթաց այս դրությամբ չկա», - նշեց Կսրապետյանը:

Իսկ այն հարցին, թե հնարավո՞ր է, որ սա նախընտրական շրջանում ճնշում է Սերժ Սարգսյանի վրա՝ աշխարհի երեք տարբեր կենտրոններից, Վլադիմիր Կարապետյանն ասաց. «Ոչ, ես չեմ կարծում, որովհետև Ղարաբաղի հարցն ընտրություններից առաջ չեն լուծում: Նման  բարդ հարց... Բոլորն էլ ունեն այդ գիտակցությունը, այդ հարցի կարգավորման ուղղությամբ նախընտրական շրջանում իշխանությունների վրա ճնշում չեն գործադրի: Ես չեմ տեսնում որևէ կապ»: