Քոբանիում արդեն 2 ամիս շարունակվում են թեժ մարտերը

Թուրք-սիրիական սահմանի մերձակայքում գտնվող Քոբանի քաղաքում շարունակվում են թեժ բախումները քրդական ուժերի և «Իսլամական պետության» միջև:

Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, տեղական աղբյուրները հաստատել են, որ վերջին ժամերին հատկապես թեժ են բախումները քաղաքի հարավային և հարավ-արևելյան հատվածներում: Ազգային պաշտպանական ուժերը ռմբակոծում են ԻՊ-ի դիրքերը: Մյուս կողմից' ռմբակոծությունը շարունակում են միջազգային դաշինքի օդանավերը: Ավելի քան 7 օդային հարվածներ ուղղվել են քաղաքում ԻՊ-ի դիրքերի ուղղությամբ:

Չնայած միջազգային դաշինքի օդային հարվածներին, ԻՊ-ի շարքերը համալրվում են թարմ ուժերով: Վերջին օրերին նրանց են միացնել Ռակկայի և Մանբիջայի ԻՊ-ի անդամներ, ինչի հետևանքով ահաբեկիչներին կրկին հաջողվել է ներխուժել քաղաքի կենտրոն:

Արաբական մեկ այլ աղբյուր տեղեկացնում է, որ բեշմերգի ուժերն Իրաքյան Քրդստանում ռազմական վարժանքներ են անցկացնում սիրիացի քրդերի հետ:

Շուրջ երկու ամիս շարունակվող բախումների ընթացքում Քոբանիում զոհվել է 1200 մարդ, որոնց մեծամասնությունը ԻՊ-ի անդամներ են: ԻՊ-ի կորուստները հասնում են 700-ի, իսկ քրդական ուժերինը՝ 400-ի: Ահաբեկչական կազմակերպությունը փորձում է վերահսկողություն հաստատել ռազմավարական կարևոր նշանակություն ունեցող քաղաքի վրա: Քաղաքի և մերձակա գյուղերի մոտ 300 հազար բնակիչ ստիպված հեռացել են իրենց տներից: Նրանցից մոտ 180 հազարը փախուստի են դիմել դեպի Թուրքիա: