Թևան Պողոսյանը «Ժառանգության» ուղեծրում ամենևին նոր մարդ չէ. Ստյոպա Սաֆարյան

Մարտի 18–ին հրապարակվեց «Ժառանգություն» և «Ազատ Դեմոկրատներ» կուսակցությունների միասնական խորհրդարանական ցուցակը, որի 6-րդ տեղում ընդգրկված է «Մարդկային զարգացման միջազգային կենտրոն» ՀԿ–ի տնօրեն Թևան Պողոսյանը։ Վերջինս հայտնի է հայ–թուրքական հարաբերություններում սահմանի բացման դիրքերից հանդես գալու փաստով, և այդ համատքստում, կարծես թե, այնքան էլ բնական չէ հայ–թուրքական սահմանի բացման դեմ հանդես եկող «Ժառանգության» ցուցակում նրա ընդգրկվելը։ Նշենք նաև, որ Թևան Պողոսյանը՝ մարզերում գյուղացիների հետ իր կազմակերպության անցկացրած հանդիպումներ ժամանակ  հայ–թուրքական հարաբերությունների կարգավորումը ներկայացնում էր իշխանությունների՝ սահմանի բացման դիրքերից։ «Ժառանգության» համամասնական ցուցակում ընդգրկված գործչի և կուսակցության քաղաքական ուղեծրի հակասության վերաբերյալ Լուրեր.com-ի թղթակիցը զրուցեց կուսակցության խմբակցության ղեկավար Ստյոպա Սաֆարյանի հետ, ով պարզաբանեց, որ «Ժառանգությունը» դեմ է ոչ թե սահմանի բացմանը, այլև՝ հայ–թուրքական արձանագրությւոններին։ 

«Ես որևէ խնդիր չեն տեսնում այդ երկու դիրքորոշումների միջև։ Թևան Պողոսյանը, իհարկե, հնարավորություն կունենա իր կարծիքը արտահայտելու «Ժառանգության» քաղաքական գծի վերաբերյալ, բայց նաև ոզում եմ հիշեցնել, որ դեմ լինել հայ–թուրքական արձանագրությւոններին, չի նշանակում դեմ լինել հայ–թուրքական սահմանի բացմանը կամ հայ–թուրքական հարաբերությունների կարգավորմանը», – մանրամասնեց պատգամավորը։ 

Սաֆարյանը նաև նշեց, որ կարող է հազարավոր փաստեր վկայակոչել, թե որքան սերտ է եղել  երկու ինստիտուտների՝ «Ռազմավարական եւ ազգային հետազոտությունների հայկական կենտրոն»–ի(Րաֆֆի Հովհաննիսյանի հիմնադրած կենտրոնը) և «Մարդկային զարգացման միջազգային կենտրոն»–ի (Թևան Պողոսյանի գլխավորած կենտրոնը) համագործակցությունը։ «Ուզում եմ ասել՝ Թևան Պողոսյանը «Ժառանգության» ուղեծրում ամենևին նոր մարդ չէ», – հավատացրեց նա։

 Իսկ այն հարցին, թե արդյոք Թևան Պողոսյանի՝ ԱՄՆ–ից ֆինանսական միջոցներ ստանալու և այդ երկրի քաղաքական գիծը առաջ տանելու մասին խոսակցությունները ստվեր չեն նետում իրենց կուսակցությա վրա, Սաֆարյանը պատասխանեց, թե՝ «դա ասողի իրավունքն է»։ « Ես մի բան գիտեմ, որ 2001թ.–ից ես ինքս ղեկավարել եմ Րաֆֆի Հովհաննիսյանի հիմնադրած կենտրոնը, և ինքս՝ որպես այդ կենտրոնի ղեկավար, հրաշալի գիտեմ, թե որքան սերտ են եղել մեր հարաբերությունները Թևան Պողոսյանի գլխավորած կենտրոնի հետ։ Եվ նաև ես ինքս գոնե գիտեմ, որ նրանք համակրել են «Ժառանգությանը» 2007–ին, և նաև կարող եմ ասել, որ դրանից հետո էլ ցանկացած հարթակ տրամադրել են «Ժառանգությանը»՝ ի թիվս այլ հանգամանքների», – հավելեց պատգամավորը։

Զրույցի ավարտին Ստյոպա Սաֆարյանը նշեց, որ իրենք(«Ժառանգությունը») լավ գիտեն, թե իրենց քաղաքական ցուցակում «որ թեկնածուի արժանիքները որքան են, և որևէ խնդիր չունեն այլ բացատրություններ տալու կամ հավատալու այլ բացատրությունների»։