«ARMFOOD» ապրանքանիշի այծի կաթում հայտնաբերվել են աղիքային ցուպիկի խմբի մանրէներ

Տնտեսություն 4 Նոյեմբեր, 2011 10:57

««ARMFOOD» ապրանքանիշի ապրանքատեսակները՝ մածուն, կաթնաշոռ, թթվասեր, լաբորատորիայում են ու պատասխանը կլինի ամենուշը վաղը՝ առավոտյան, թե արդյո՞ք դրանցում էլ կան աղիքային ցուպիկի խմբի մանրէներ և ստաֆիլակոկի բակտերիաներ»,– այս մասին այսօր հրավիրված ասուլիսում ասաց գյուղատնտեսության նախարարության սննդամթերքի անվտանգության պետական ծառայության տեղեկատվության և հասարակայնության հետ կապերի բաժնի պետ Բաբկեն Պիպոյանը։

Անդրադառնալով թեմային՝ նա ասաց հետևյալը. «Այս պահին արտադրությունը կանգնած է ու կվերականգնվի այն ժամանակ, երբ վարչական վարույթը լիարժեք կավարտվի ու կպարզվի, թե ինչու են առաջացել այդ բակտերիաները ու որ ապրանքատեսակներում կան»։ Բաբկեն Պիպոյանը հավելեց նաև, որ նման դեպքերում տուգանքը սահմանվում է 300 հազար դրամի չափով :

Հիշեցնենք, որ գյուղատնտեսության նախարարության սննդամթերքի անվտանգության պետական ծառայության կողմից իրականացված ուսումնասիրության արդյունքում շուկայում իրացվող «Էյ-Էս-Բի-սոֆթ» ՍՊԸ-ի «ARMFOOD» ապրանքանիշի այծի կաթում հայտնաբերվել են աղիքային ցուպիկի խմբի մանրէներ և ստաֆիլակոկի բակտերիաներ: Մինչ ամբողջ խմբաքանակի շուկայից դուրս բերումը ծառայությունը կոչով դիմել է ազգաբնակչությանը լինել աչալուրջ և զերծ մնալ «ARMFOOD» ապրանքանիշի կաթնամթերքի ձեռքբերումից: Բանախոսն ասաց, որ իրենք հետ են կանչել «ARMFOOD» ապրանքանիշի բոլոր ապրանքատեսակները: