Ազգային ժողովում նշվեց Ֆրանկոֆոնիայի միջազգային օրը

Մարտի 20-ին Ֆրանկոֆոնիայի միջազգային օրն ու միամսյակը Ազգային ժողովում նշվեց խորհրդարանական կայքի ֆրանսերեն էջի շնորհանդեսով: Միջոցառմանը ներկա էին ԱԺ նախագահ Սամվել Նիկոյանը, պատգամավորներ, ֆրանկոֆոնիայի գծով արտգործնախարարի խորհրդական-դեսպան Քրիստիան Տեր-Ստեփանյանը, Հայաստանում Ֆրանսիայի եւ Շվեյցարիայի դեսպանները, ֆրանսիական կազմակերպությունների ու կրթական հաստատությունների ներկայացուցիչներ:

ԱԺ նախագահը գոհունակությամբ նշեց, որ այսուհետեւ Հայաստանի Ազգային ժողովի կայքը «կխոսի» նաեւ ֆրանսերեն՝ առցանց հաղորդակցության միջոցով աշխարհին հասանելի դարձնելով Հայաստանի խորհրդարանի լուրերը: ԱԺ նախագահի խոսքերով՝ սա Ֆրանկոֆոնիայի միջազգային օրվա առիթով Ազգային ժողովի նվերն է ֆրանսալեզու ընթերցողներին: Խորհրդարանի պաշտոնական էջում դեռ մեկ տարի առաջ են սկսվել ֆրանսերեն թարգմանվել ԱԺ պատմության, գործառույթների ու կառուցվածքի մասին պատմող էջերը:

Ազգային ժողովի նախագահն իր ողջույնի խոսքում նշեց Ֆրանկոֆոնիայի խորհրդարանական վեհաժողովի կարեւոր դերակատարությունը քաղաքական ազատությունների ու իրավունքների պաշտպանության, խորհրդարանների դերի բարձրացման ու համագործակցության հարցում' հիշեցնելով, որ Հայաստանի ԱԺ-ն 2009 թ. ստացավ ասոցացված անդամի կարգավիճակ: «Մենք կարեւորում ենք խորհրդարանական դիվանագիտությունը, եւ վստահ ենք, որ անդամ երկրների խորհրդարանների միջեւ համագործակցությունը մեծ դեր ու ներուժ ունի ֆրանկոֆոնիայի որդեգրած համամարդկային արժեքների, լեզվամշակութային բազմազանության պահպանման, խաղաղության հաստատման, ժողովրդավարության զարգացման, մարդու իրավունքների պաշտպանության գործում»:

Խորհրդարանն այս համագործակցության արդյունքում դարձել է «Նորիա» ծրագրի շահառու, որի շրջանակներում ֆրանսերեն է թարգմանվում ԱԺ պաշտոնական կայքը, ինչպես նաեւ խորհրդարանի 40 աշխատակիցների համար անց են կացվում ֆրանսերենի դասընթացներ:

Հյուրերին խորհրդարանում ողջունեց նաեւ Ֆրանկոֆոնիայի ԽՎ-ում հայկական պատվիրակության ղեկավար Արմեն Ռուստամյանը: Նա նշեց, որ պատմական իրողություններով պայմանավորված՝ հայ ժողովրդին բնորոշ է դարձել մշակութային եւ լեզվական բազմազանությունը: Ֆրանսերենի իմացությունը, ըստ բանախոսի, խորհրդարանականների համար շատ կարեւոր է նաեւ այն առումով, որ միջազգային կազմակերպություների պաշտոնական լեզուներից մեկն է: Ֆրանկոֆոնիայի կազմակերպությունն այսօր մեծ դերակատարում ունի նաեւ մարդու իրավունքների պաշտպանության հարցում, եւ բանախոսի համոզմամբ' Հայաստանի եվրաինտեգրման ճանապարհին կարեւոր առաջնահերթություն է առաջընթացը մարդու իրավունքների ոլորտում:

Շնորհակալություն հայտնելով ԱԺ կայքի ֆրանսերեն էջը պատրաստողներին՝ Արմեն Ռուստամյանը հույս հայտնեց, որ նոր էջը կարդարացնի այցելուների սպասելիքները:

Շվեյցարիայի Համադաշնության արտակարգ եւ լիազոր դեսպան Կոնստանտին Օբոլենսկին խորհրդանշական համարեց, որ խորհրդարանի ղեկավարությունը որոշել է այսպես նշել Ֆրանկոֆոնիայի օրը: Նրա կարծիքով՝ Ֆրանսերենի նկատմամբ ցուցաբերած վերաբերմունքով Հայաստանի խորհրդարանն արժանի է դառնալու Ֆրանկոֆոնիայի ԽՎ-ի լիիրավ անդամ: Նա կարեւոր ու ողջունելի համարեց, որ օրենսդիր մարմնի կայքը թարգմանվում է տարբեր լեզուներով:

Հայաստանում Ֆրանսիայի արտակարգ եւ լիազոր դեսպան Անրի Ռենոյի գնահատմամբ՝ խորհրդարանական այս միջոցառումը ֆրանկոֆոնիայի օրերին մշակութային եւ կրթական նշանակությունից բացի ստացավ նաեւ քաղաքական կշիռ: Դեսպանը, տպավորված լինելով խորհրդարանում ֆրանսերենի նկատմամբ դրսեւորվող ուշադրությունից, նկատեց, որ, էջը թարգմանելով տարբեր լեզուներով, խորհրդարանը բաց է դառնում աշխարհի համար:

Միջոցառման ավարտին Տիգրան Հեքեքյանի ղեկավարությամբ «Հայաստանի փոքրիկ երգիչները» կատարեցին ֆրանսերեն հայտնի ու սիրված երգեր, ինչպես նաեւ հնչեցրին Կոմիտաս: