ԼՂ բանակցությունները բավական ինտենսիվ են ընթանում. Իգոր Պոպով

«ԼՂ հակամարտության խաղաղ կարգավորման բանակցային գործընթացը բավական ինտենսիվ է ընթանում», - հայտարարել է ԵԱՀԿ Մինսկի խմբի ռուսաստանցի համանախագահ Իգոր Պոպովը՝ «Ռիա նովոստի»–ին տված հարցազրույցում։

«Քննարկվող հիմնական սկզբունքները պետք է հետագայում դառնան ԼՂ հակամարտության խաղաղ համաձայնագրի ստորագրման հիմնական բազան», - ասել է Պոպովը։

Նա նշել է, որ անցյալ տարի տեղի է ունեցել երեք հանդիպում, որի ընթացքում Հայաստանի և Ադրբեջանի նախագահները պարզաբանել են իրենց դիրքորոշումը չհամաձայնեցված հարցերում։

«Համեմատած համաձայնեցված հարցերի, քննարկելու շատ քիչ հարցեր են մնացել, որոնք առավել բարդ են։ Հունվարին Սոչիում տեղի ունեցած հանդիպմանը նախագահներ Ալիևը և Սարգսյանը հայտնել էին իրենց մտադրության մասին՝ հիմնարար սկզբունքների շուրջ համաձայնագրի ստորագրումն արագացնելու առումով՝ հաշվի առնելով մինչ օրս կատարված աշխատանքը։ Այդ դիրքորոշումը ցույց է տալիս, որ կողմերը ոչ միայն պատրաստ են շարունակել խաղաղ գործընթացը, այլև մտադիր են օգտագործել բոլոր ջանքերը սպասված արդյունքի հասնելու համար», – ասել է Պոպովը։

Ռուս համանախագահը նշել է, որ ԵԱՀԿ Մինսկի խմբի համանախագահող երկրները հակամարտության լուծումը միմիայն տեսնում են խաղաղ ճանապարհով։ 

Սակայն, Պոպովը նշել է, որ վերջնական համաձայնության հասնելն առաջին հերթին կախված է հակամարտող կողմերի բարի կամքից։