Դպրոցականի ֆիլհարմոնիան Երևանի բոլոր վարչական շրջաններում կանցկացնի դաս-համերգներ

2007 թ. ՀՀ մշակույթի նախարարության ջանքերով վերաբացվել է «Դպրոցականի ֆիլհարմոնիան» որի նպատակն է ճանաչողական, բացատրական թեմատիկ միջոցառումների միջոցով նպաստել երեխաների գեղագիտական դաստիարակությանն ու վաղվա բարձրաճաշակ ու գրագետ ունկնդրի ձևավորմանը: Այդ միջոցառումները դաս-համերգներ են, որոնց ընթացքում բանախոսը՝ այլ կերպ ուսուցիչը ներկայացնում, բացատրում, պարզաբանում, վերլուծում է մատուցվող նյութը: Դաս-համերգների ընթացքում ներկայացվում են անվանի կոմպոզիտորների, գրողների կյանքն ու ստեղծագործական ուղին, ապրած ժամանակաշրջանը: Ներկայացվում են երաժշտական գործիքներ, երաժշտական տարբեր ժանրեր՝ դրանց կառուցվածքային առանձնահատկությունները, ազգագրական պարեր և այլն: Պատանի մասնակիցներին դաս-համերգների վերաբերյալ հնարավորություն է ընձեռվում արտահայտել իրենց անմիջական տպավորություններն ու զգացումները:

Ս.թ. ապրիլ–մայիս ամիսներին «Դպրոցականի ֆիլհարմոնիան» Երևանի բոլոր վարչական շրջաններում նախաձեռնել է իրականացնել շուրջ 12 դաս-համերգներ, միջոցառումներ՝ «Երգի թևերով», «Պարեց Սասունն ու աշխարհը հիացավ», «Տարվա եղանակներ», «Կոմիտասի լույսը», «Հայ ազգային նվագարաններ», «Դասական կոմպոզիտորները» թեմաներով: Նախատեսվում է ծրագիրը դարձնել շարունակական և նոր դաս-համերգներ անցկացնել նաև ՀՀ մարզերում: