«Հայկական ժամանակ». Կառավարության հերթական արդար որոշումը ընտրությունների շեմին

Կառավարության առաջիկա նիստում կքննարկվի արձանագրային որոշման մի նախագիծ, որը ներկայացրել է ՀՀ աշխատանքի և սոցիալական հարցերի նախարարությունը: Ըստ այդմ, ապրիլի մեկից այլևս ետ չեն գանձվի այն անձանց ստացած կենսաթոշակները, ովքեր օրենսդրության խախտմամբ մինչև վերջերս երկու կենսաթոշակ են ստացած եղել:

Իր ներկայացրած բացատրություններում նախարարությունը պարզաբանում է, որ խոսքը վերաբերում է հիմնականում այն անձանց, ովքեր կենսաթոշակ են ստացել և սոցապ ծառայությունից, և զինվորական կենսաթոշակ՝ նախարարությունից, ոստիկանությունից, ԱԱԾ-ից: Ավել վճարված կենսաթոշակների ընդհանուր ծավալը կազմում է մոտ 76 միլիոն դրամ: Ցուցակները «մաքրելուց» հետո ժամանակին երկու կենսաթոշակ ստացած անձինք արդեն մեկ կենսաթոշակ են ստանում, ավելին, այդ մեկ կենսաթոշակից էլ դեռ պահումներ են արվում նախկինում ստացած ավել գումարը ետ գանձելու նպատակով: Կառավարության վերը նշված արձանագրային որոշման իմաստն այն է, որ այդ գանձումները դադարեցվեն: Եվ դա, բնականաբար, ընտրությունների շեմին: Ստացվում է, որ նրանք, ովքեր «սխալմամբ» երկու կենսաթոշակ են ստացել, հայտնվում են ավելի նպաստավոր վիճակում՝ այն մարդկանց նկատմամբ, ովքեր «օրենսդրության խախտմամբ» երկու թոշակ չեն ստացել: Սա կառավարության հերթական արդար որոշումն է ընտրությունների շեմին: