«Ժողովուրդ». ՕԵԿ-ն իր ծնունդն այս անգամ մի քանի ամիս շուտ է արել

Փորձելով հետ չմնալ կոալիցիոն գործընկեր «Բարգավաճ Հայաստան» կուսակցությունից՝ «Օրինաց երկիր»-ը Կարեն Դեմիրճյանի անվան մարզահամերգային համալիրում երեկ մեծ շուքով նշեց կուսակցության 15-ամյակը: Այդ ընթացքում Արթուր Բաղդասարյանը հրապարակեց նաև կուսակցության համամասնական ընտրացուցակի առաջին 15 համարները: Բայց ուշագրավն այն է, որ ՕԵԿ-ի նախկին ու ներկա շատ թիմակիցներ հիշում են, որ կուսակցությունը հիմնադրվել է հունիսի 20-ին: Այսինքն՝ ՕԵԿ-ն իր ծնունդն այս անգամ մի քանի ամիս շուտ է արել (ինչը լավ նշան չէ), քանի որ մայիսի 6-ին ընտրություններ են սպասվում: Բնականաբար, ՕԵԿ մամուլի խոսնակ Սուսաննա Աբրահամյանը հերքել է «Ժողովուրդ»-ի լուրը՝ ասելով. «Մեր նախկին կուսակցականները թող ավելի ուշադիր և անաչառ լինեն իրենց մոտեցումներում: Նախկին կուսակցականները կարող են սխալվել, իսկ կուսակցության հիմնադիրը՝ երբեք: ՕԵԿ-ը հիմնադրվել է 1997-ի մարտի 20-ին, որն ամրագրվել է փաստաթղթում և հաստատվել համագումարում»: Մինչդեռ «Ժոդովուրդ»-ի աղբյուրները փոխանցում են, որ 15 տարի առաջ ՕԵԿ-ը հիմնադիր համագումարն արել է հունիսի 20-ին, որի ժամանակ տպագրվել է կուսակցության պաշտոնաթերթի առաջին համարը: Ի դեպ, ՕԵԿ կայքում կուսակցության ծննդյան ամսաթվի մասին ոչինչ չկա: Նշված Է միայն տարեթիվը: