Անդրանիկ սարկավագ Մանուկյանն այսօր ներկայացրեց «Լիլի» ձայնասկավառակն ու «Հայոց աշխարհ» տեսասկավառակը

Ակունքներից բխող ազգային, հայրենասիրական երգերը՝ նոր մոտեցմամբ, բայց և մաքրամաքուր կատարմամբ: «Սասուն» ազգագրական երգի-պարի համույթի ղեկավար Անդրանիկ սարկավագ Մանուկյանն այսօր ներկայացրեց «Լիլի» ձայնասկավառակն ու «Հայոց աշխարհ» տեսասկավառակը:

«Լիլի»-ն խաղիկ երգ է, որն Անդրանիկ սարկավագը երգում է վաղուց: «Լիլի»-ի նման երգերը, նրա խոսքերով, մարգարիտներ են, որոնք, ցավոք, այսօր նկատելի չեն: Երեք տարվա աշխատանքի արդյունքում ստեղծված ձայնասկավառակում տեղ գտած երգերն Անդրանիկ սարկավագի կատարմամբ են. «Ես երգել եմ, որպեսզի ակունքներից չհեռանանք, հետո նոր ժամանակակից գործիքների միջամտությունն է եղել: Ցավոք, մինչև նոր հնչյուններ չեն ավելանում, ազգային երգերը ճանաչում չեն ստանում»:

Տասն ազգային, հայրենասիրական, կարոտի և կատակ երգեր՝ յուրօրինակ գործիքավորմամբ: Անդրանիկ սարկավագը նշեց, որ ձայնասկավառակի խորհուրդը «Վերցունք տղերք հրացան» երգն է:

«Հայոց աշխարհ»-ը թե' աչք, թե' ականջ շոյող եզակի տեսաերիզ է, որտեղ 1ժամ 20ր հնչում են գեղջկական, ծիսական, հեթանոս, օրորոցային երգերից մինչև Կոմիտաս: Գարեգին Առաքելյանի և Անդրանիկ սարկավագի կատարմամբ համերգը թողարկվել է 2000 օրինակով ու երեք լեզուներով՝ հայերեն, ռուսերեն, անգլերեն: Ձայնասկավառակը վաճառքում կլինի 15-20 օրից:

Դե իսկ «Նարոտ-Կարոտ» ռազմահայրենասիրական երգերի ու պարերի տեսահոլովակների շարքը, ինչպես նկատեց սարկավագը, Հայոց բանակը ոգեշնչելու և արմատներին վերադարձնելու առաքելությամբ է: Դարձյալ 2000 օրինակով լույս տեսած ձայնասկավառակները տրվել են Պաշտպանության նախարարությանը՝ հայ զինվորներին բաժանելու համար:

«Հայրենասիրական երգերի պաշարն անսպառ է, ձայնագրած ունեմ 60-70 երգ»,- ասաց Անդրանիկ սարկավագը՝ ցավ հայտնելով, որ դրանք թողարկելու և տարածելու համար իրեն օգնություն է պետք, ինչը չկա. «Ում դուռը ծեծում ես՝ անմիջապես փակվում է կամ ում զանգում ես՝ առաջինը հարցնում է, թե համարը որտեղից գիտեմ»: