Դինքի սպանության գործով նոր պաշտոնյա կհարցաքննվի

Ստամբուլի հայկական «Ակոս» պարբերականի նախկին խմբագրապետ Հրանտ Դինքի սպանության գործով հարցաքննության է կանչվել Տրապիզոնի այն ժամանակվա անվտանգության վարչության ղեկավար Ռեշաթ Ալթայը: Ինչպես հաղորդում է «Արմենպրես»-ը, այս մասին տեղեկացնում է թուրքական Demkrathaber.net-ը: Ալթայն առաջիկա շաբաթվա ընթացքում ներկայանալու է Ստամբուլի Չաղլայան արդարադատության պալատ և համապատասխան ցուցմունք է տալու: Հաղորդվում է նաև, որ հարցաքննության են կանչվելու ազատ արձակված Էրհան Թունջելը և բանտում գտնվող Յասին Հայալը:

Թուրքական Evrensel պարբերականի հաղորդմամբ' գործը քննող Ստամբուլի ահաբեկչության և կազմակերպված հանցավորության բյուրոյի դատախազ Յուսուֆ Հաքքը Դողանը դեկտեմբերի 8-ին հարցաքննել է «կասկածյալի» կարգավիճակում գտնվող ոստիկան Բահար Թեքինին: Վերջինս հարցաքննության ժամանակ հերքել է իր դեմ ներկայացված բոլոր մեղադրանքները:

Բահար Թեքինը մեկն էր այն ինը պաշտոնյաներից, որոնց նկատմամբ, Թուրքիայի արդարադատության նախարարության կայացրած որոշման համաձայն, թույլատրվել էր հետաքննություն վարել:

Դինքի սպանության գործի վերանայման շրջանակում օրերս հարցաքննվել էր նաև հանցագործության իրագործման ժամանակաշրջանում Ստամբուլի ոստիկանության հետախուզական վարչության բաժնի ղեկավար Ալի Ֆուաթ Յըլմազերը: Վերջինս հարցաքննության ժամանակ հայտարարել էր, որ Դինքի սպանության աղբյուրը «Էրգենեկոն» գործով անցնող պաշտոնաթող գեներալ Վելի Քյուչյուքն է: