Թուրքիան կարող է դուրս գալ ԵՄ Մաքսային միությունից

Socar Turkey Enerji (Ադրբեջանի պետական նավթային ընկերության' SOCAR-ի թուրքական ստորաբաժանում) նախագահ Քենան Յավուզը հայտարարել է, որ Եվրամիության Մաքսային միությանն անդամակցությունը վնաս է հասցնում Թուրքիայի տնտեսական շահերին: Այս մասին, ինչպես հաղորդում է «Արմենպրես»-ը, հայտնում է թուրքական տնտեսական Dovizg azetesi թերթը: Նրա խոսքով' Թուրքիան պետք է վերանայի ԵՄ Մաքսային միությունում իր անդամակցության հարցը, քանի որ Անկարան այլևս նրա կարիքը չունի:

Նա նաև նշել է, որ ԵՄ և ԱՄՆ Անդրատլանտյան առևտրաներդրումային գործընկերության պայմանագիրն ստորագրելու ժամանակ պետք է հաշվի առնվեն Թուրքիայի տնտեսական շահերը:

Թուրքիայի ԵՄ հարցերով նախարար Վոլքան Բոզքիրն ավելի վաղ հայտարարել էր, որ Անկարան կդադարեցնի անդամությունը ԵՄ Մաքսային միությունում, եթե հաշվի չառնվեն նրա տնտեսական հետաքրքրությունները Եվրոպական միության և ԱՄՆ-ի Տրանսատլանտյան առևտրաներդրումային գործընկերության ստորագրման ժամանակ:

Նա նաև նշել էր, որ 1995 թվականին ԵՄ Մաքսային միությանը Թուրքիայի միանալու մասին համաձայնությունը կնքելու ժամանակ այնտեղ չի եղել հոդված այն մասին, որ ԵՄ և այլ երկրների հետ պայմանավորվածությունները չեն տարածվում Թուրքիայի վրա: Նրա խոսքով' այն երկրները, որոնց նկատմամբ ԵՄ հետ ազատ առևտրի ռեժիմ է հաստատված, կարող են Թուրքիա ապրանք արտահանել զրոյական մաքսային դրույքով:

Թուրք նախարարը նաև ասել էր, որ եթե ամերիկյան ապրանքները թուրքական շուկա մտնեն առանց մաքսատուրքերի, ապա Թուրքիան կարող է կորցնել մինչև 2,5 մլրդ դոլար:

«Եթե Տրանսատլանտյան առևտրաներդրումային գործընկերության մասին ԱՄՆ-ի հետ ԵՄ պայմանագիրը ստորագրվի և Թուրքիան հայտնվի չպաշտպանված վիճակում, ապա մենք ստիպված կլինենք սառեցնել Մաքսային միությունում մեր անդամությունը»,- հայտարարել էր Բազքիրը: