«Չորրորդ Ինքնիշխանության» հարցերին պատասխանել է Մհեր Սեդրակյանը` Թոխմախի Մհերը

«ՉԻ» հարցերին պատասխանել է Մհեր Սեդրակյանը' Թոխմախի Մհերը 

- Պարոն Սեդրակյան, վերջին անգամ դուք ԱԺ-ում հայտնվել եք 1995 թվականին եւ պատգամավոր եք աշխատել մինչեւ 1999 թվականը: 13 տարի անց դուք կրկին փորձելու եք վերադառնալ Ազգային ժողով: Ինչը ձեզ դրդեց նորից ցանկություն հայտնել լինել Ազգային ժողովում:

- Ցանկությունը եղավ այսպես. այս տարիների ընթացքում եղան պատգամավորներ, որոնք ընտրվեցին, գնացին, մոռացան' իրենք մեզ, մենք' իրանց: Հետո էղավ պահ, որ ես արդեն չեմ աշխատում, բայց իմ այն տարիքն է, որ պետք է աշխատել: Ընկերներ կան, ինչպես նաեւ ժողովրդի մի հատվածը, չի կարող ամբողջ համայնքն ինձ ընդունել, սիրել ու հավատալ, բայց կա մի մասա, որը ընդունում է ինձ, հենց նրանք էլ առաջարկեցին մտածել պատգամավորության մասին: Նրանց առաջարկությամբ եւ իմ ցանկությամբ որոշեցի դառնալ պատգամավոր, որպեսզի կարողանամ իմ համայնքի, իմ ժողովրդի շահերը կամ նրանց հուզող խնդիրները բարձրացնել խորհրդարանում: Եթե ժողովրդի օգտին կամ վնաս օրինագծեր լինեն' համապատասխանաբար' կողմ կամ դեմ լինեմ: Որպես օբյեկտիվ մարդ' որոշեցի դառնալ պատգամավոր:

- Դուք ՀՀԿ անդամ եք, հետեւաբար քաղաքական պատասխանատվություն եք կրում նաեւ այդ ուժի գործունեության համար: Ձեր օբյեկտիվությունը ինչպե՞ս եք պատկերացնում այդ քաղաքական ուժի շրջանակներում:

- Ես չեմ պատկերացնում, որ ՀՀԿ-ն սխալ որոշումներ կայացնի, բայց եթե հանկարծ ես հասկանամ, որ ժողովրդի դեմ է արվում ինչ-որ բան, ես պատրաստ եմ կանգնել իմ ժողովրդի, իմ համայնքի բնակչի, իմ ընտրողի կողքին: Գիտեք, եթե ժողովուրդն ինձ վստահել է ու տվել է այդ հնարավորությունը, որ ես դառնամ Ազգային ժողովի պատգամավոր եւ պաշտպանեմ իր շահերը, բնականաբար, ես հենց ժողովրդի շահերը պիտի պաշտպանեմ, ոչ թե քաղաքական ուժի: Ես կբացատրեմ իմ կուսակցական ընկերներին, բոլորին կբացատրեմ, որ ճիշտը սա է: Ես չգիտեմ, ամեն մարդ ունի իր հասկացողությունը. իմ դեպքում ժողովրդականությունը մեծ է, եւ ես, բնականաբար, առաջին հերթին պահելու եմ ժողովրդի շահը: Չեմ վիճելու, չեմ կռվելու, բացատրելով, հասկացնելով եմ աշխատելու: Պահի տակ բոլորս էլ կարող է սխալ թույլ տանք, բայց եթե ես հասկանամ, որ ժողովրդի շահերին կպնող բան ա, կամ ժողովուրրդը պետք ա դժգոհի, ես չեմ սեղմի այդ կոճակը: Հասկացել եմ, որ չի կարելի ժողովրդին նեղացնել, մանավանդ որ ինքն է քեզ լիազորում, դու որպես ժողովրդի ներկայացուցիչ ես արդեն գնում Ազգային ժողով:

- Դուք ասացիք, որ չի կարելի ժողովրդին նեղացնել, բայց կոնկրետ Մհեր Սեդրակյան անձնավորությունը մշտապես ներգրավված է եղել ընտրական գործընթացներում եւ չեմ կարող ժխտել, որ ձեր անունը կապվել է ընտրախախտում, ծեծուջարդ, բռնություն երեւույթների հետ: Այս անգամ ձեզանից նման պահվածք էլի ենք ակնկալելու, թե՞ դուք փոխվել եք այս տարիների ընթացքում:

- (Երկար ծիծաղում է-հեղ.) Նման ասեկոսեներ եղել են, ես էլ եմ շատ լսել: Բայց չի կարելի համարել, որ դրանք բոլորը իրականություն են: Աղվեսի դունչը երբ չի հասնում խաղողին, ասում ա' խակ ա: Ես միշտ եղել եմ ՀՀԿ ներկայացուցիչ: Եթե իրանք կարողանային ինձ հաղթել…(խոսքը այլ քաղաքական ուժերի ներկայացուցիչների մասին է-հեղ.) իմ հարգանքը, իմ հարաբերությունները այս համայնքի բնակիչների հետ միշտ բարձր մակարդակի վրա է եղել: Ես ղեկավար եմ եղել, շատ մարդկանց օգնել եմ, բազմաթիվ մարդիկ իմ ասած խոսքը ընդունել են: Հաղթանակներն այս ձեւով են եղել: Պարզ ա, եթե մարդը առիթն օգտագործում է, եւ մեկ-մեկ էլ ուզում է քեզ վիրավորած լինի…գիտեք, ես թույլ չեմ տա, որ ինձ վիրավորեն: Այդպիսի փորձ անողներին ես իրանց տեղն եմ դնում, իսկ դա իրենք կապում են ընտրության հետ եւ քննադատում են: Ոչ: Ես ինքս ինձ հարգում եմ եւ թույլ չեմ տվել ու չեմ տա, որ որեւէ մեկն ինձ նեղացնի: Իսկ դա չի նշանակում, որ ես չգիտեմ ինչ եմ: Իմ անձը նեղացնում եք, ես ձեզ պատասխան եմ տալիս, հետո ստացվում է, որ ես մեկին ճնշեցի, որ ընտրակեղծիք անի: Բնական է, մենք էլ կարող ենք մի քիչ անուշադիր լինել եւ տեղերում կեղծիքներ անողներ հայտնվեն: Այս անգամ ես հատուկ հրավիրելու եմ շտաբի պետերին, հանձնաժողովի նախագահներին, մեր կուսակցական ընկերներին' մեր թաղի ՕԵԿ-ին, Դաշնակցությանը, Բարգավաճին, Հանրապետականին, Հայ ազգային կոնգրեսին…բոլորով նստելու ենք ու իրար տղամարդավարի խոստանանք, որ մի հատ ավելորդ բան չի լինելու: Գնանք մաքուր ընտրության. ով ինչ ձայն ունի' թող տանի էլի. ինչի՞ համար մենք մեր թաղեցիներով լավ կամ վատ լինենք: Մեկ ա, մեր ընկերներն ու վերադասները վերջում գնում են Ազգային ժողով, եւ իրենք իրար հետ ընկերություն, ախպերություն են անում, եւ վերջում մենք ենք մնում թշնամիներ: Դրա համար մի քիչ խելոք պետք է մտածել ու անենք ընենց, որ էդ ընտրությունները մեր հարաբերությունների վրա չազդեն: Մենք մնանք ընտրություններից հետո լավ ընկերներ ու թաղեցիներ: Այս անգամ էրեբունի համայնքի ընտրություններն այսպիսին են լինելու :

- Այս անգամ ասացիք, այսինքն' նախորդ անգամներին հակառակն է եղե՞լ:

- Էն ժամանակ հարաբերություններ չեն եղել, մթնոլորտն ուրիշ ա եղել: Լարված ենք եղել' բոլոր քաղաքական ուժերի ներկայացուցիչներն էլ, թշնամաբար ենք միմյանց նկատմամբ տրամադրված եղել:

- Քաղաքական դաշտում ոչինչ չի փոխել. որտեղի՞ց ձեզ մոտ առաջացավ համերաշխության գաղափարը' այս կատաղի մրցապայքարի ժամանակ:

- Հանրապետության նախագահն ինքն է ասել' պետք է գնալ արդար եւ ազնիվ ընտրության: Մենք էլ հասկանում ենք' ճիշտը դա է: Չի կարելի ընտրություններով մի ամբողջ թաղի պահել լարված վիճակում' էս թաղն էն թաղի հետ կռվի, էս կուսակցությունը' էն կուսակցության հետ: Հանրապետության նախագահը հրահանգել է, որ մաքուր արդար ընտրություն անցկացվի, որպեսզի միջազգային հանրությունն էլ մեզ ճիշտ ընկալի: Շատ անգամ է մեր պետությունը վարկաբեկվել, բայց քանի որ ուզում ենք մենք մեր դիրքրեը ամրացնել Եվրոխորհրդարանում եւ ամբողջ աշխարհում, պետք է մի անգամ նորմալ, ցիվիլ ընտրություն անենք:

- Ցիվիլ ընտրության մասին եք խոսում: Մինչդեռ օրեր առաջ, մեղմ ասած, ձեր ոչ ցիվիլ պահվածքի ականատեսը դարձանք: Լրագրողին անպատվել էիք միայն այն բանի համար, որ նա ձեզ փորձել էր լուսանկարել:

- Փողոցում, փողոցում:

- Այո' փողոցում: Եվ ի՞նչ…- Դեռ մայթն էլ չէի հասցրել անցնել: Ճիշտ է, միջադեպ եղել է: Ես հարգում եմ բոլոր լրագրողներին, բայց բաներ կան, որ ազդում է մարդու նյարդերի վրա: Օրինակ, ես ունեմ թշնամիներ,ինձ հետ դեպք է պատահել ու բոլորդ էլ գիտեք: Բոլորդ գիտեք, թե 8 տարի առաջ ինչ պատահեց ինձ հետ: Մեկ էլ կանգնած ես փողոցում, մեկը ապարատը պահել ա վրադ, ինչ-որ մեկը, ու մի երեսուն վայրկյանի չափ նկարում է: Քիչ է մնում քեզ ասի' հլը գլուխդ մի հատ սենց թեքի աջ, որ լավ նկար դուրս գա: Ճիշտն ասած, սկզբում ես ձայն չհանեցի, ասացի նկարում ա' թող նկարի: Բայց որ ապարատը երկար պահեց վրաս' ես ներվայնացա: Կարող եմ չէ մտածել, որ նկարում են ինձ, որ հետո նկարս տան քիլլերներին: Որովհետեւ դեպք է եղել ինձ հետ ու էդ դեպքը մինչեւ օրս չի բացահայտվել, եւ ես շատ մտավախություններ ունեմ: Դրանից հետո, երբ ասում եմ' ո՞վ ես, ի՞նչ ես անում, մոտենում է լրագրողը եւ դիկտաֆոնը բերանս մտցնելով, սկսում է հարցեր տալ: Ճիշտ է, ասել եմ՝ գնա հորդ նկարի: Ես հունից դուրս եկա: Սա լրագրողի դեմ չի եղել, որովհետեւ ես հարգում եմ լրագրողի մասնագիտությունը եւ լրագրողներին: Ես էլ եմ դեմ, որ լրագրողներին նեղացնեն եւ վիրավորեն, բռնության ենթարկեն, ծեծեն: Բայց լրագրողն էլ իր չափը պետք է ճանաչի: Լրագրողները միշտ իմ նկատմամբ վատ են տրամադրված, մտածում են, թե ես չգիտեմ ով եմ: Հենց շփվում են հետս, ասում են' այ մարդ, էդ մարդը նորմալ մարդ ա, ինչի՞ էինք մենք տենց վատը մտածում նրա մասին: Էդ կողմից Գագիկ Շամշյանը լավ է. էնպես է նկարում, որ ոչ էլ իմանում ես' նկարել ա: Գագիկ Շամշյանը թաքուն է նկարում, իսկ սա եկել ա րոպեներով ապարատը պահել ա վրաս: Ուրեմն' ձեզ ասեմ, որ իրենց նպատակն ինձ նկարելը չէր, նպատակն ինձ պրովոկացիայի ենթարկելն էր: Լրագրության մեջ էլ պետք է արհեստավարժ լինես, նկարելու մեջ էլ, ամեն ինչի մեջ էլ արհեստավարժ լինելը լավ է: Ենթարկվեցի պրովոկացիայի: Իրենց նպատակն էլ հենց դա էր:

- Ի՞նչ կարգախոսով եք գնում ընտրության:

- Ես կարգախոս չունեմ: Ինձ այս համայնքում բոլորը ճանաչում են: Իմ ժողովուրդն է' կընտրեն-չեն ընտրի, մեկ է, ես իրենց նեղին հասնում եմ ու կանգնած եմ իրենցից յուրաքանչյուրի համար:

- Կոնկրետ Էրեբունիում կարո՞ղ եք կանխատեսել, թե որ քաղաքական ուժն ինչքան ձայն կհավաքի:

- Ես չեմ կարող ասել, որովհետեւ պատկերն ինձ համար էլ դեռ պարզ չէ: Բայց այն, որ ՀՀԿ-ն պետք է կրի այստեղ, դրանում համոզված եմ:

- Ինչո՞ւ եք վստահ, որ ՀՀԿ-ն է հաղթելու: Եթե բռնություններ չեն լինելու, եթե կեղծիքներ չեն լինելու, ապա շատերը չեն հավատա ձեր ասածին:

- Դե այստեղ անձերի հարց կա: Կա Մհեր Սեդրակյան, կան այլ անուններ, որոնք այստեղ ներկայացնում են Հանրապետականը: Ես չեմ ասում, որ ես բոլորի կողմից շատ ընդունված եւ սիրելի դեմք եմ, բայց մեծամասնությունը տեսել է իմ հարգանքը եւ վստահում է ինձ: Ինձ թվում է՝ հարգանքը մեծ գործոն է:

- Դուք չկաք ՀՀԿ համամասնական ցուցակում. ի±նչն է ձեզ ստիպելու աշխատել այդ ցուցակի համար, հատկապես որ այդ ցուցակն առանձնապես հաջող չէ:

- Ճիշտն ասած, արդեն կամ ցուցակում, բայց չգիտեմ, թե որ տեղում եմ: Համ էլ այստեղ խոսում է մեր ընկերության եւ գաղափարի գործոնը: Մենք հարգում ենք մեր նախագահին, ինքը ոնց ասի, այդպես էլ անելու ենք: Ո՞նց կարող ենք չանել:

- Ինքն ասել է ցիվիլ ընտրություններ: Ցիվիլ ընտրությունների արդյունքում ՀՀԿ-ն կարո՞ղ է հաղթող ճանաչվել:

- Աշխատելու ենք, որ հաղթի: Ցիվիլ ընտրություն է լինելու, բայց միաժամանակ ասացի, որ մեր ֆակտորն էլ է աշխատելու: Մեր խոսքն ընդունելու եւ հարգելու են: Անելու են այնպես, ինչպես ասելու ենք: