Ոստիկանները Գյումրիում ապօրինաբար սահմանափակում են «Քվեն ուժ է» շարժման գործունեությունը

Ինչպես երեկ տեղեկացրել էինք, Գյումրու կենտրոնում՝ Թատերական հրապարակի դիմաց, արդեն մի քանի օր է՝ երիտասարդ ակտիվիստները տեղադրել են կարմիր վրան, որին մոտենում էին անցորդները, թղթեր ստորագրում ու հեռանում: Հիշեցնենք, որ փակցված ցուցանակների վրա գրաված էր «Քվեն ուժ է», «Մի՛ վաճառեք ձեր երեխաների ապագան» եւ այլն:

Իսկ այսօր արդեն այդ վրանը չկար: Ոստիկանները երեկ ուշ երեկոյան ակցիայի կազմակերպիչներին կանչել էին ոստիկանության բաժին ու հրահանգել անհապաղ տարածքից հեռացնել վրանը՝ պատճառաբանելով, որ ակցիան արտոնված չէ Գյումրու քաղաքապետարանի կողմից: Երիտասարդ ակտիվիստները համաձայնել են հանել վրանը:

Սակայն ոստիկանները միայն վրանի տեղադրումն արգելելով չէին սահմանափակվել: Այսօր կեսօրին նրանք դարձյալ հայտնվել էին հրապարակում ու հրահանգել հանել նաեւ սեղանը, որին մոտենում ու ստորագրում են անցորդները: Բացի այդ՝ ոստիկաններն ակցիայի մասնակիցներին արգելել են թռուցիկներ ու բուկլետներ բաժանել անցորդներին: Նախաձեռնության խմբի անդամները որոշել են այս անգամ չենթարկվել ոստիկանների ապօրինի պահանջին, քանի որ, ըստ նրանց, օրենքի որևէ կետ իրենց գործողությունների հետևանքով չի խախտվում:

«Մենք օրենքի ոչ մի խախտում այս պահին թույլ չենք տալիս, չենք խանգարում հասարակական կարգը»,- պնդում են ակցիայի մասնակիցները:

Նրանք ոստիկաններին խորհուրդ են տալիս զբաղվել ավելի լուրջ գործով: Երիտասարդները հավաստիացնում են, որ նախընտրական քարոզչությունը դեռ չսկսված՝ որոշ թեկնածուներ արդեն սկսել են նվերների տեսքով ընտրակաշառքներ բաժանել քաղաքացիներին և որ ոստիկանությունը լավ կանի՝ զբաղվի այդ հարցով:

Հիշեցնենք, որ ակցիայի կազմակերպիչները «Քվեն ուժ է» քաղաքացիական նախաձեռնության ակտիվիստներն են: Երիտասարդները մեկ անգամ եւս կոչ են արել գյումրեցիներին չտրվել գայթակղություններին եւ աճուրդի չհանել սեփական քվեն: Ակցիայի մասնակիցները գյումրեցիներին առաջարկում են ստորագրել ազատ և արդար ընտրությունների անցկացման պայմանագիր: 

Հիշեցնենք նաև, որ քաղաքացիական նախաձեռնության ստեղծման մասին դեռևս անյալ տարի հայտարարել էր ՀՅԴ կուսակցությունը:

Լուսանկարը՝ azatutyun.am-ի