ՀՅԴ–ն կկրկնապատկի ՀՆԱ–ն և կեռապատկի պետական բյուջե՞ն (տեսանյութ)

Այսօր Հայ հեղափոխական դաշնակցությունը հանրության ուշադրությանը ներկայացրեց առաջիկա խորհրդարանական ընտրությունների իր կարգախոսը և «Նախընտրական հռչակագիրը»։ Եթե կուսակցության կարգախոսը՝ «Ազատություն, արդարություն, դաշնակցություն», ներկաների մոտ արտառոց արձագանքների չարժանացավ, ապա հռչակագիրը որոշակի հարցերի տեղիք տվեց։ Մասնավորապես հռչակագրում նշված է. «կկրկնապատկվի ՀՆԱ–ն, կեռապատկվի պետական բյուջեն, կստեղծվի շուրջ 200 հազար նոր աշխատատեղ», «մեկ անձի համար տարեկան առողջապահական ծախսը կհասցվի նվազագույնը 150 հազարի (այժմ՝ բյուջետային ֆինանսավորումը չի գերազանցում 21 հազարը)», «միջին մասնագիտական և բարձրագույն կրթությունը, ինչպես նաև հանրակրթական դպրոցներն ամբողջությամբ կլինեն անվճար» և այլն։

Հռչակագրում տեղ գտած այս դրույթների վերաբերյալ Լուրեր.com-ի թղթակիցը զրուցեց ՀՅԴ Գերագույն մարմնի անդամ Արմեն Ռուստամյանի հետ, որից փորձեց ճշտել, թե ինչպե՞ս է հնարավոր նման ծրագրի իրականացումը, երբ ՀՀ արտաքին պարտքը կազմում է 4 մլրդ դոլար։

«Տնտեսական, քաղաքական, հակակոռուպցիոն համակարգերի ստեղծումը. սրանք բոլորը նպաստելու են միջավայրի փոփոխմանը, համակարգայի՛ն փոփոխմանը, և, ի վերջո, բերելու են ամբողջական իշխանափոխության։ Դա իր մեջ հսկայական ռեսուրս է պարունակում, որ մենք, հույսը մեր ուժերի վրա դնելով, արդար, ազատ համակարգ ձևավորելով, համերաշխության մթնոլորտ ստեղծելով, կարողանանք երկիրը իսկապես դուրս բերել այս ճգնաժամային իրավիճակից», –  նշեց Ռուստամյանը։