Գյումրիում կնշվի Խոսքի ազատության օրը

Ժուռնալիստների «Ասպարեզ» ակումբը մարտի 25-ին Գյումրիում հինգերորդ անգամ կնշի Խոսքի Ազատության Օրը: Տոնական հանդիսությունը կկայանա ժամը 14:00-16:00-ին Գյումրու «Կինո Հոկտեմբեր»-ի ճեմասրահում:

«Հանդիսությանը մասնակցելու են հրավիրվում բոլոր նրանք, ում համար թանկ է խոսքի, արտահայտման եւ մամուլի ազատությանը, ով կարեցածը ներդրել է եւ ներդնում է Խոսքի ազատության հաղթանակի համար: Հանդիսությանը ներկա են լինելու լրագրողներ, ԶԼՄ-ներկայացուցիչներ, հասարակական եւ քաղաքական գործիչներ, դիվանագիտական առաքելությունների ներկայացուցիչներ, ինչպես նաեւ գործարար աշխարհի մարդիկ:

Անցյալ տարիներին Խոսքի Ազատության Օրվա հանդիսությունների ժամանակ պարգեւատրվել եւ խրախուսվել են մոտ երկու տասնյակ լրագրողներ ու զանգվածային լրատվամիջոցներ: Այս տարի նույնպես նախատեսվում է հատուկ պարգեւներ հանձնել իրենց աշխատանքով աչքի ընկած լրագրողների, ԶԼՄ-ների, քաղաքացիների, ինչպես նաեւ' մարդկանց, ովքեր ջանքեր են ներդրել Խոսքի ազատության պաշտպանության եւ լավագույն կիրարկման համար»,- ասված է կազմակերպության հաղորդագրությունում:

Խոսքի Ազատության Օրը Գյումրիում ավանդաբար նշվում է մարտի 25-ին՝ այն օրը, երբ տարիներ առաջ համաժողովրդական զորակցության եւ հանգանակության շնորհիվ հնարավոր եղավ իշխանությունների աննախադեպ հարձակումից պաշտպանել տեղական ԳԱԼԱ հեռուստաընկերությունը  եւ փրկել եթերազրկման սպառնալիքից: