«Հայկական ժամանակ». ՀՀ ոստիկանությունը տեղեկանք է տվել17 ամիս երկրից բացակայած Էդուարդ Մադաթյանին

ՀՀ ոստիկանության անձնագրային և վիզաների վարչությունը «Սիլ կոնցեռնի» պատվավոր նախագահ, թիվ 10 ԸՏ-ում պատգամավորի թեկնածու առաջադրված Խաչատուր Սուքիասյանին տրված տեղեկանքը, ըստ որի՝ նա վերջին հինգ տարում մշտապես բնակվել Է Հայաստանում, առոչինչ է ճանաչել այն հիմնավորմամբ, որ Սուքիասյանը վերջին հինգ տարում՝ 10 ամիս 20 օր հանրապետությունից բացակայել է:

ՀՀ ոստիկանությունը, սակայն, չի պատրաստվում չեղյալ անել վերջին հինգ տարում ավելի քան 17 ամիս ՀՀ-ում չբնակված, թիվ 11 ԸՏ-ում պատգամավորի թեկնածու առաջադրված ՀՀ տրանսպորտի և կապի նախկին նախարար Էդուարդ Մադաթյանին տրամադրած համանման տեղեկանքը:

Թերթը հիշեցնում է, որ դեռևս 2004-ի աշնանը Էդուարդ Մադաթյանի դեմ քրեական գործ էր հարուցվել՝ Ռոբերտ Քոչարյանի և Սերժ Սարգսյանի դեմ մահափորձ կազմակերպելու կասկածանքով: Իսկ 2004-ի դեկտեմբերի 6-ից նրա նկատմամբ հետախուզում էր հայտարարվել: Հետախուզման չորս տարիների ընթացքում բազմիցս մամուլում նշվել է, որ նա Հայաստանում չէ, ինչը հաստատել էր նաև ինքը՝ Մադաթյանը, 2008-ի օգոստոսի 13-ին «Զվարթնոց» օդանավակայանում՝ երբ չորս տարի դրսում մնալուց հետո՝ ստանալով ՀՀ գլխավոր դատախազի համաձայնությունը, որոշել էր վերադառնալ Հայաստան: Այդ օրը «Զվարթնոց» օդանավակայանի VIP սրահում, ի թիվս բազմաթիվ անձանց, նրան դիմավորողների շարքում է եղել նաև այդ ժամանակ դեռևս Էրեբունու թաղապետի պաշտոնը զբաղեցնող ՀՀԿ-ական Մհեր Սեդրակյանը, որը Մադաթյանի խնամին է:

Մադաթյանի բացակայության հարցի շուրջ ՀՀ ոստիկանության անձնագրային և վիզաների վարչության պետ Հովհաննես Քոչարյանը  «ՀԺ»-ին ասել է. «Ցանկացած անձի ելքումուտքի մասին պաշտոնական աղբյուրը կամ տվյալների բազան, որը հիմք է տալիս նման բան փաստել, դա ՍԿՏ համակարգն է: ՍԿՏ համակարգը վարող լիազոր մարմինը ՀՀ ազգային անվտանգության ծառայությունն է: Ոստիկանությունն իր լիազորություններն իրականացնելիս իրավունք ունի այդ համակարգից օգտվել: ՍԿՏ համակարգի տվյալները ստուգվել են, և հետևություններն արվել են ըստ դրանց: Այնպես որ, ձեր կողմից հիշատակված թեկնածուի (էդուարդ Սադաթյանի- Վ.Հ.) մասին նման տվյալներ մենք չունենք նրա մուտքի և ելքի վերաբերյալ, որ Հայաստանի Հանրապետությունից բացակայել է ձեր ասած ժամանակում' վերջին 5 տարում: Հետախուզման մեջ գտնվելով, մարդը կարող է նաև Հայաստանում լինել: Իսկ այն տարբերակը, որ նա հետախուզման մեջ գտնվելուց կարող էր Հայաստանից սահմանային անցակետով պաշտոնապես դուրս գալ, դա անհնար է: Նրան սահմանին կբռնեին»: