«Հայկական Ժամանակ». Սամվել Ալեքսանյանը երեկվա կրակոցների հեղինա՞կ

Երեկ «ՀԺ»-ն գրել էր, որ մարտի 19-ի լույս 20-ի գիշերը Երևանի կենտրոնում կրակոցներ են հնչել, սակայն ոստիկանությունը պնդում է, nր տեղյակ չէ, և որ նման դեպք չի արձանագրվել:

Թերթը երեկ շարունակել է հետաքրքրվել այդ միջադեպով և ներկայացրել է դեպքի ականատեսի հետ իրենց զրույցի մի հատվածի սղագրությունը: Ականատեսի անունը, հասկանալի պատճառով, չենք նշում:

- Ի՞նչ էր եղել գիշերը:

- Երեկ գիշերը ստեղ կրակոց եղավ, խփոցի էր, երեք անգամ օդ կրակեց, քացու տակ... խփեց գլուխը բորդյուրին: Լավ ա՝ ձեռքերով պահեց:

-Ո՞ւմ խփեց:

-Ճանաչում եմ: Մոնիկան ա: Ստեղի պարողներից ա, ռուս ա...

-Ասում են, որ խփողը Լֆիկն ա եղել:

-Հա... ես ճանաչում եմ... Էս օբյեկտը Լֆիկինն ա, էս սաղ իրանն ա: Ընդհանուր էս շենքը Լֆիկինն ա:

«ՀԺ»-ն հիշեցնում է նաև, որ ինչպես արդեն տեղեկացրել էին, կրակոցների մասին լուրը իրենց հետ զրույցում հաստատել էին մի քանի ականատեսներ:Թեև Սախարովի հրապարակի մերձակայքում ապրող և աշխատող մարդիկ խուսափում էին խոսել այդ մասին, մի կին ու մի տղամարդ «ՀԺ»-ին պատմել էին, որ մարտի 19-ի լույս 20-ի գիշերը, ժամը 2-3 սահմաններում «Դուոս» գիշերային ակումբից դուրս է եկել մի տղամարդ՝ ռուս պարուհու հոտ, նրանց միջև վեճ է բռնկվել, ինչից հետո տղամարդը բղավել է, գոտկատեղից հանել է զենքը՝ մեկ անգամ կրակել աղջկա ուղղությամբ, երեք անգամ՝ օդ, ինչից հետո բռնել է աղջկա մազերը ու գլուխը հարվածել փողոցի մայթեզրին:Ականատեսի խոսքով՝ այդ տղամարդը շատ նման էր ԱԺ օլիգարխ պատգամավորներից մեկին: