Ես կմնամ անկախ լրագրող. Պետրոս Ղազարյան

Տևական ժամանակ է, ինչ լուրեր են շրջանառվում, թե «Կենտրոն» հեռուստաընկերության «Ուրվագիծ» հաղորդաշարի հեղինակ-վարող Պետրոս Ղազարյանը հայտնվելու է «Բարգավաճ Հայաստան» կուսակցության համամասնական ցուցակում: Ավելին՝ անգամ ցուցակում նրա տեղի մասին էին խոսում՝ նշելով, որ նա լինելու է անցողիկ հորիզոնականներում: Այս մասին հայտարարությամբ հանդես եկավ նախ հեռուստալրագրողը, ապա այդ ամենը հաստատեց ԲՀԿ խմբակցության պատգամավոր Նաիրա Զոհրաբյանը:

Նախօրեին ուշ երեկոյան հրապարակված ԲՀԿ ցուցակում, սակայն, բացակայում էր Պետրոս Ղազարյանի անունը. ավելի ուշ հասկանալի դարձավ, որ հեռուստալրագրողն ընդհանրապես ընդգրկված չէ ԲՀԿ-ի ցուցակում: Ինչու՞ և ի՞նչն է պատճառ հանդիսացել, որ իրավիճակը Պետրոս Ղազարյանի մասով փոխվի: «Չորրորդ ինքնիշխանություն»-ը փորձել է այս հարցերի պատասխանները ստանալ հենց Պետրոս Ղազարյանից:

-Պարոն Ղազարյան, հրապարակվեց ԲՀԿ համամասնական ցուցակը: Ձեր անունն այնտեղ չկար: Ինչպե՞ս կմեկնաբանեք:

-Երբ ես հայտարարեցի, որ ցանկանում եմ գնալ խորհրդարան, ենթադրում էի, որ հնարավոր է համատեղել լրագրողական աշխատանքը: Սակայն ներսից ծանոթանալով գործընթացներին՝ նման համատեղությունն ինձ անհամատեղելի թվաց: Ես կամ պետք է լինեի լիարժեք պատգամավոր, կամ մնայի լրագրող: Եվ ես առաջարկեցի պարոն Ծառուկյանին ինձ չներառել համամասնական ցուցակի մեջ: Երկրորդ, ես մտածում էի, որ ապագա խորհրդարանը շանս ունի նախորդներից որակապես ավելի լավը լինելու, բայց երբ ծանոթացա տարբեր կուսակցությունների նախընտրական ցուցակներին, հասկացա, որ խորհրդարան չգնալու իմ որոշումը լիովին արդարացված է:

- Ձեր և Ձեր նմանների ներգրավվածությունը տարբեր կուսակցությունների ցուցակներում չէ՞ր կարող փոխել խորհրդարանի պատկերը:

- Որքան էլ կուսակցություններն իրարից տարբեր են, խորհրդարանը մեկ քաղաքական մարմին է, և խնդիրը ոչ մեկ մարդու, ոչ էլ մեկ կուսակցության մեջ է: Թե գործող խորհրդարանում, թե, վստահ եմ, ապագա խորհրդարանում կլինեն շատ արժանավոր մարդիկ, բայց խորհրդարանի ընդհանուր որակը, ցավոք, նրանցով պայմանավորված չի լինի:

-Ուզում եք ասել, որ նոր ձևավորվելիք խորհրդարանը Ձեզ և Ձեր նմաններին արժանի չէ՞: Ձեր ասածից այդ է բխում:

-Կարծում եմ՝ այս խորհրդարանը արժանի չէ ՀՀ որևէ քաղաքացու: Ցավոք, ծանոթանալով կուսակցությունների նախընտրական ցուցակներին, քիչ հավանականություն եմ տեսնում խորհրդարանի ընդհանուր որակի բարձրացման: Դա մեկ թիմով պայմանավորված չէ:

- Ի՞նչ եք պատրաստվում անել առաջիկայում:

- Ես կմնամ անկախ լրագրող: Մենք պատրաստվում ենք նոր եթերաշրջանի և կփորձենք հեռուստադիտողներին ներկայացնել ողջ քաղաքական սպեկտորը, որպեսզի մեր քաղաքացիները հնարավորինս ճիշտ ընտրություն կատարեն: Կփորձենք դառնալ ՀՀ քաղաքացուն արժանի հեռուստատեսություն:

-Ի՞նչ պետք է անել, որ հեռուստատեսությունն իրապես դառնա ՀՀ քաղաքացուն արժանի:

-Այսօր TV-ն չունի կարծիք ձևավորելու մենաշնորհ: Ինտերնետը TV-ի չափ ընդգրկում չունի, բայց ռեալ մրցակցում է կարծիք ձևավորելու և լրատվական հոսքեր ապահովելու հարցում: Ֆեյսբուքում միայն 230 հազար ակտիվ օգտատեր կա: Այս պայմաններում TV-ները պետք է լուրջ հետևություններ անեն, որպեսզի չկորցնեն իրենց լրատվական գործառույթը: Ես տեսնում եմ ընդհանուր դաշտում կա նման գիտակցություն, գոնե՝ միտումներ:Մենք ապրիլի սկզբին կմտնենք բոլորովին նոր որակի եթերաշրջան՝ երկու ժամը մեկ լուրերի թողարկումով՝ նոր դեմքերով և տեխնիկական նոր հնարավորություններով: Մյուս կողմից՝ TV-ները պետք է հանրային բանավեճի և երկխոսության կենտրոնում լինեն:

Այդ ֆունկցիան գրեթե չի կատարվում: Մենք նոր թոք-շոու ենք նախատեսել այդ բացը լրացնելու համար: Նախընտրական պայքարում մենք կփորձենք հնարավորինս հավասար, ընդգրկուն ներկայացնել բոլոր խաղացողներին, որպեսզի քաղաքացին կարողանա առավել պատրաստված ընտրություն կատարել: Վերջիվերջո ժողովրդական ընտրությունների կարևորագույն չափանիշներից մեկն էլ համակողմանի լուսաբանումն է, և «Կենտրոն» TV-ն կփորձի իր պատկառելի լուման ունենալ այս գործընթացում: