Մենք պետք է կոռեկտ լինենք. Կարինե Աճեմյանը Նիկոյան–Ալավերդյան միջադեպի մասին (տեսանյութ)

«Ես կարծում եմ, որ մենք բոլորս պետք է ենթարկվենք կանոնակարգին, պետք է լինենք կոռեկտ, պետք է իրար հարգենք, և այն պատգամավորները, որոնք միշտ կոռեկտության  կոչեր են անում, պետք է իրենց օրինակով դա դրսևորեն խորհրդարանում»,– ԱԺ նախագահ Սամվել Նիոկյանի և «Ժառանգություն» խմբակցության պատգամավոր Լարիսա Ալավերդյանի միջև երեկ տեղի ունեցած միջադեպն այսպես մեկնաբանեց ՀՀԿ պատգամավոր Կարինե Աճեմյանը։

«Ըստ կանոնակարգի նա պիտի հարց ուղղեր, իսկ եթե դու արդեն շեղվում ես բուն ասելիքից, ԱԺ նախագահն իրավունք ունի դադարեցնելու ելույթը», – նշեց Աճեմյանը՝ հավելելով, որ այս դեպքում տեղի ունեցածի մեղավորությունը նաև Լարիսա Ալավերդյանինն է։  

Իսկ թե ինչպիսի՞ն կլիներ պատգամավորի արձագանքը, երբ իրեն նման կերպ «ընդհատեին» հարցին ի պատասխան՝ վերջինս շեշտեց, որ իրեն նման ձևով չէին ընդհատի, որովհետև նման ձևով հանդես չէր գա։ «Ռեգլամենտը պետք է պահպանել ամեն դեպքում, դա վերաբերում է բոլոր պատգամավորներին»,– նշեց նա։

Հիշեցնենք, որ երեկ՝ ԱԺ քառօրյայի հարցուպատասխանի ընթացքում, «Ժառանգություն» խմբակցության պատգամավոր Լարիսա Ալավերդյանն իր ելույթի ընթացքում հարց ուղղեց ՀՀ Արդարադատության նախարար Հրայր Թովմասյանին, թե չի՞ պատրաստվում արդյոք կառավարությունը հետ կանչել «Արտակարգ դրության իրավական ռեժիմի մասին» օրենքի նախագիծը, որը հաստատավել էր դահլիճում քվորման բացակայության պայմաններում։

Ալավերդյանի ելույթի ընթացքում Նիկոյանը շարունակ բղավում էր, որ Անահիտ Բախշյանի հարց տալու ժամանակն է, բայց պատգամավորը չէր հեռանում խոսափողից։ «Տիկի՛ն Ալավերդյան, Ձեր խոսելու մարմաջը չե՞ք կարող բավարարել, չորրորդ գումարման ԱԺ-ի ժամանակն ավարտվում է: Նիստից հետո որքան ցանկանաք, թույլ կտանք, որ խոսեք»,- բղավելով ասում էր Նիկոյանը: