Թուրքիայում 12 քուրդ է սպանվել

Քրդական բանվորական կուսակցության զինյալների (PKK) դեմ Թուրքիայի հարավ–արևելյան շրջաններում ձեռնարկված հատուկ գործողությունների հետևանքով զոհվել է 12 մարդ, հաղորդում է Hurriyet Daily News-ը։

Մարտական գործողություններն իրականացվել են Իրաքին և Սիրիային սահմանակից Շրնակ գավառի մատույցներում։ 

Ըստ թերթի՝ հինգ ոստիկաններ զոհվել էին չորեքշաբթի տեղի ունեցած մարտական գործողությունների ժամանակ, իսկ այսօր ևս մեկ ոստիկան է զոհվել մարտերի ժամանակ։ Միևնույն ժամանակ հաղորդվում է զինված ուժերի 10 վիրավորների մասին։ Մինչդեռ ըստ BBC–ի՝ զոհվել են յոթ քուրդ զինյալներ։

Ռազմական ուղղաթիռներով և ինքնաթիռներով իրականացված մարտական գործողությունները սկսկվել են մարտի 20–ին։ Ըստ BBC–ի՝ անկարգությունները հրահրվել են քուրդ զինյալների կողմից կիրակի օրը Դիարբեքիր քաղաքում։ Անկարգությունները տարածվել են նաև հարևան բնակավայրերում։  

Սակայն, ինչպես գրում է Hurriyet Daily News–ը, ռազմական գործողությունները սկսվել են չորեքշաբթի օրը, որի նպատակն է եղել քուրդ զինյալների վնասազերծումը, որոնք եղանակային պայմանների բարելավմանը զուգահեռ սկսել են իրենց ակտիվ տեղաշարժը։

Ըստ թերթի՝ հատուկ գործողություններն իրենց մասշտաբայնությամբ 2012–ի ընթացքում ամենամեծն են եղել։ Քուրդ զինյալների դեմ նախորդ լայնամասշտաբ գործողությունն իրականացվել է 2011–ի դեկտեմբերին, որի ժամանակ զոհվել էր 35 խաղաղ բնակիչ։

Հիշեցնենք, որ քուրդ ապստամբները պայքարում են Թուրքիայի իշխանությունների՝ դեմ ինքնավարության իրավունք ձեռք բերելու համար։ 1980–ականների կեսերից սկսված պայքարի հետևանքով զոհվել է 45 հազար մարդ։