Հայաստանում անցկացվում են Ուկրաինայի մշակույթի օրեր

Ս. թ. մարտի 21-28-ը Երևանում և հանրապետության մարզերում փոխադարձաբար անցկացվում են Ուկրաինայի մշակույթի օրեր: Այդ առիթով Հայաստան է ժամանել երկրի պաշտոնական պատվիրակությունը՝ Ուկրաինայի մշակույթի նախարար Միխայիլ Կուլինյակի գլխավորությամբ: Պատվիրակության կազմում են նաև «Всесвит» ամսագրի գլխավոր խմբագիր Օլեգ Միկիտենկոն, Ուկրաինայի նկարիչների միության նախագահ Միկոլա Կիշչուկը, «Киевська камерата» մենակատարների ազգային անսամբլի գլխավոր տնօրեն և գեղարվեստական ղեկավար Վալերի Մատյուխինը, «Галицкi передзвони» մունիցիպալ երգչախմբի գեղարվեստական ղեկավար Իգոր Դեմյանեցը:

Հայաստանում Ուկրաինայի մշակույթի օրերը կմեկնարկեն մարտի 22-ին, Հայաստանի գրողների միությունում, որտեղ
16.00-ին տեղի կունենա Հայ գրատպության 500-ամյակին նվիրված՝ ուկրաինական «Всесвит» ամսագրի /հրատարակվում է 1925 թ./ հոբելյանական հատուկ համարի հայաստանյան շնորհանդեսը: Ամսագիրն ամբողջությամբ նվիրված է հայ գրավոր մշակույթին, պատմական դրվագներին, հիշարժան դեպքերին ու դեմքերին: Ուկրաիներեն թարգմանությամբ ներկայացված է հայ դասական ու ժամանակակից գրողների ստեղծագործությունների ընտրանին: Ամսագրի առաջին էջերում տեղ են գտել նաև Հայաստանի և Ուկրաինայի նախագահների, առաջին դեմքերի ողջույնի ուղերձներն ու բարեմաղթանքները՝ ուղղված երկու երկրների մշակութային առնչակցություններին, գրող, թարգմանիչ Միրոն Նեստերչուկի «Հայաստանի պոեզիա» ժողովածուի հանրային ներկայացումը, որը հրատարակվել է 2011 թ. Ուկրաիայում հայ մշակույթի օրերի անցկացման կապակցությամբ: Անթոլոգիայում ընդգրկված է հայ գրականությունը բանահյուսությունից, ժողովրդական խաղիկներից ու տաղերից մինչև միջնադարի գոհարներ՝ Սահակ Պարթև, Մեսրոպ Մաշտոց, Մովսես Խորենացի, Գրիգոր Նարեկացի, Ներսես Շնորհալի, Սայաթ-Նովա, մինչև վերջին հարյուրամյակի կաճառներ՝ Հովհաննես Թումանյան, Վահան Տերյան, Սիամանթո, Վարուժան, Իսահակյան, Չարենց, Սևակ… ավելի քան երեք տասնյակ հեղինակների ստեղծագործություններ՝ ուկրաիներեն թարգմանությամբ, պետական պատվերով 2012 թ. հայերենով լույս է տեսել ուշագրավ մեկ այլ թարգմանական հրատարակություն՝ Միխայիլ Կոցյուբինսկու «Մոռացված նախնիների ստվերները» վիպակը, որը ներառում է նաև դրվագներ համանուն ֆիլմի նկարահանման պատմությունից, Սերգեյ Փարաջանովի «Հավերժական շարժում» էսսեն և լուսանկարներ,
հայ-ուկրաինական գրական շավիղները կամբողջացնի Հայաստանում ուկրաինական համայնքի կողմից ՀՀ մշակույթի նախարարության աջակցությամբ հրատարակվող «Դնիպրո Սլավուտիչ» /հրատարակվում է 1997 թ. 1000 օրինակով/ ամենամսյա երկլեզու թերթը, որը համակողմանիորեն անդրադառնում է թե՛ համայնքի խնդիրներին, թե՛ լեզվի պահպանությանը, թե՛ հայ-ուկրաինական մշակութային անցուդարձին:
«Արամ Խաչատրյան» համերգասրահում նույն օրը՝ ժամը 18:00-ին, «Киевська камерата» մենակատարների ազգային անսամբլի և Իվանո-Ֆրանկովսկի «Галицкi передзвони» երգչախմբի մասնակցությամբ տեղի կունենա Հայաստանում Ուկրաինայի մշակույթի օրերի գալա համերգը:
«Киевська камерата» մենակատարների ազգային անսամբլը /Ուկրաինայի ամենանշանավոր և բարձր պրոֆեսիոնալիզմով հայտնի կամերային նվագախմբերից է, որի բազմազան երկացանկն ընդգրկում է կամերային երաժշտության տարբեր ոճերի և ժանրերի ստեղծագործություններ: Ներառված են ինչպես 17-19-րդ դարերի, այնպես էլ 20-21-րդ դարերի համաշխարհային գործեր: Նվագախումբը հիմնադրվել է 1977 թ. Ուկրաինայի կոմպոզիտորների միությանը կից: Այժմ նվագախմբի գլխավոր տնօրենն ու գեղարվեստական ղեկավարն է Ուկրաինայի Տարաս Շևչենկոյի անվան ազգային մրցանակի դափնեկիր, Ուկրաինայի ժողովրդական արտիստ Վալերի Մատյուխինը/ մշակույթի օրերի շրջանակներում մարտի 23-ին համերգային ծրագրով հանդես կգա Գյումրու Վ. Աճեմյանի անվան պետական դրամատիկական թատրոնում, իսկ մարտի 26-ին' ժամը 19:00-ին, Երևանի Կոմիտասի անվան կամերային երաժշտության տանը:

Իվանո-Ֆրանկովսկի «Галицкi передзвони» երգչախմբի համերգը /«Հալիցկի պերեդզվոնի» կամերային երգչախումբը ստեղծվել է 1989թ., «Հալիցյան ղողանջներ» անվանումը ստացել է որպես իրենց տարածաշրջանի հինավուրց Հալիցիայի խորհրդանիշ: 2005 թ. երգչախումբը ղեկավարում է Իգոր Դեմյանեցը: Կոլեկտիվի երկացանկը ներառում է ինչպես ուկրաինացի, այնպես էլ արտերկրյա դասական և ժամանակակից կոմպոզիտորների գործեր, հոգևոր երաժշտություն, ուկրաինական և տարբեր ազգերի ժողովրդական երգեր: Երգչախմբի երկացանկի կարևոր մաս են կազմում կարպատյան տարածաշրջանի կոմպոզիտորների գործերը/ մարտի 23-ին տեղի կունենա Սպիտակի մշակույթի տանը, իսկ մարտի 26-ին՝ ժամը 19:00-ին «Առնո Բաբաջանյան» համերգասրահում:
Մարտի 25-ին՝ ժամը 12:00-ին, Հայաստանի ազգային պատկերասրահում կբացվի Ուկրաինայի նկարիչների ազգային միության հավաքածուի ցուցահանդեսը /ցուցադրությունում կներկայացվեն տարբեր սերունդների նկարիչներ՝ գեղանկարչության անվանի վարպետներ Վ. Բարինովա-Կուլեբայը, Ս. Գրիգորևը, Ա. Կաշշայը, Օ. Յաբլոնսկայան և դասական կերպարվեստի այլ ներկայացուցիչներ/:

ՀՀ մշակույթի նախարարությունում հրավիրված ասուլիսին մասնակցում են Ուկրաինայի պաշտոնական և մշակութային պատվիրակությունը, ՀՀ մշակույթի նախարար Հասմիկ Պողոսյանը, նախարարի տեղակալ Արթուր Պողոսյանը, Հայաստանի գրողների միության նախագահ Լևոն Անանյանը: