«Հայկական ժամանակ». Րաֆֆի Հովհաննիսյանը այսօր կպարզաբանի իր առաջադրումը

Երեկ երեկոյան հանրային քննարկման հիմնական թեման «Ժառանգություն» կուսակցության ղեկավար Րաֆֆի Հովհաննիսյանի առաջադրումն էր թիվ 7 ԸՏ-ում՝ այն բանից հետո, երբ այստեղ թեկնածու էր առաջադրվել Նիկոլ Փաշինյանը:

Փաշինյանը առաջադրվել է 17.00-ի մոտակայքում, այսինքն՝ առաջադրումների ժամկետի սպառվելուց մեկ ժամ առաջ: Այդ պահին այնտեղ առաջադրված են եղել օլիգարխ Սամվել Ալեքսանյանը (Լֆիկ Սամո) և նրա կողմից առաջադրված ևս երկու հոգի: Ժամը 20-ի մոտակայքում ԿԸՀ-ն հրապարակել է առաջադրումների վերջնական ցանկը, և 7-րդ ընտրատարածքում առաջադրվածների թվում հայտնվել է նաև Րաֆֆի Հովհաննիսյանի անունը: Այս առաջադրումը հանրության շրջանում հարցեր է առաջացրել ոչ պատահական. բանն այն է, որ երկու օր առաջ «Ժառանգությունը» հրապարակել է մեծամասնական առաջադրումների իր ցանկը, և այնտեղ չի եղել Րաֆֆի Հովհաննիսյանի անունը, «Ժառանգությունը» 7-րդ ընտրատարածքում որևէ առաջադրում ընդհանրապես չէր պլանավորել: Հետաքրքիր է նաև, որ Րաֆֆին ինքնաառաջադրմամբ է հանդես եկել, այսինքն՝ ոչ կուսակցության կողմից: «Ժառանգության» ներկայացուցիչ Հովսեփ Խուրշուդյանը լրագրողներին ասել է, որ դա Հովհաննիսյանի անձնական որոշումն է, և որ նա այսօր ասուլիս կանի և պարզաբանումներ կտա: