«Չորրորդ ինքնիշխանություն». Արթուր Պողոսյանը սկսել է Զեյթունի բնակիչներին յուղ և բրինձ բաժանելու գործընթացը

Մի քանի օր է, ինչ Քանաքեռ-Զեյթուն համայնքում ընտրական գործընթացները նոր փուլ են թևակոխել: Շրջանառվող լուրերի համաձայն՝ այս համայնքում մեծամասնականով առաջադրված Արթուր Պողոսյանը՝ Չախկալը, որը ԴԱՀԿ պետ Միհրան Պողոսյանի՝ Քեթրինի Միհրանի հովանավորյալ թեկնածուն է, սկսել է Զեյթունի անապահով բնակիչներին յուղ և բրինձ բաժանելու գործընթացը: Սրանք նա առաջարկում է առավել խոցելի խավերին: Անապահովից մի քիչ լավ ապրող բնակիչներին նա գումար է առաջարկում: Բացի այդ, թեկնածուն ակտիվորեն սկսել է զբաղվել Քանաքեռ-Զեյթուն համայնքի բնակչության գրանցման գործերով: Բանն այն է, որ այն մարդիկ, որոնք այդ համայնքում վաղուց չեն բնակվում, ըստ այդմ՝ չեն հետաքրքրվում այդ համայնքի րնտրական գործընթացներով, ահա այդ մարդկանց հայտնաբերել ու սկսել է ժամանակավոր գրանցել ինչ-որ հասցեների վրա: Այս թեկնածուն ԴԱՀԿ պետ Միհրան Պողոսյանի «թեթև» ձեոքով ժամանակավոր գրանցման խնդիրներ է լուծում և վաղվա օրվա իր ձայներն է ապահովում համայնքի այն բնակիչների հաշվին, որոնց մի մասի հոգիները վաղուց ննջում են հանդերձյալ աշխարհում, իսկ մի մասն էլ գտնվում է արտերկրում: Փաստորեն, Սերժ Սարգսյանի և կոալիցիոն քաղաքական ուժերի այն ներքին պայմանավորվածությունը, թե իրենք իրար դեմ չեն պայքարելու նման մեթոդներով, վերստին խախտվում է հենց ՀՀԿ-ական թեկնածուի կողմից: Չախկալին այս համայնքում սատարում է ՀՀԿ-ն, իսկ ԲՀԿ-ից այստեղ առաջադրվել է գործող պատգամավոր Աշոտ Տոնոյանը՝ Տոնուսի Աշոտը: