Սիրիայի կառավարական բանակը գնդակոծում է Բինիշ քաղաքը

Սիրիայի կառավարական զորքերը ռազմական գործողություններ են իրականացնում Բինիշ քաղաքում, որը գտնվում է Սիրիայի հյուսիս–արևմտյան Իդլիբ գավառում, հաղորդում է Итар-Тасс–ը։ Ըստ տեղեկությունների` Բինիշի փողոցներում ռումբերի պայթյուններ և կրակոցներ են լսվում։ Մարդիկ լքում են իրենց տները։

Սիրիայի անկախ բանակի հրամանատարներից մեկը, որը ղեկավարում է Բինիշի ապստամբական ջոկատները, հայտարարել է,որ «եթե կառավարական զորքերը որոշել են մտնել քաղաք, ապա դա նրանց համար դժոխք կլինի։ Ոչինչ չի կարող կանգնեցնել մեզ»։

Չորս ամիս առաջ Սիրիայի կառավարական զորքերը փորձել էին գրավել քաղաքը, սակայն ապստամբներին հաջողվել էր պահպանել իրենց դիրքերը։

Հիշեցնենք, որ Սիրիայի կառավարական զորքերի և ընդդիմադիր ուժերի միջև բախումները շարունակվում են արդեն մեկ տարուց ավել։ Ըստ ՄԱԿ-ի վերջին տվյալների՝ այդ ընթացքում զոհվել է ավելի քան 8 հազար մարդ։