Մարտի 23-ը օդերևութաբանության համաշխարհային օրն է

Մարտի 23-ին Հայաստանում նշվում է օդերևութաբանի մասնագիտական տոնը։ Արտակարգ իրավիճակների նախարարության Հիդրոմետ ծառայությունում տոնի առթիվ տեղի ունեցան հանդիսավոր նիստ և ոլորտի մի շարք աշխատակիցների պարգևատրում։ Այս մասին ասված է ՀՀ ԱԻՆ պաշտոնական կայքում տեղադրված հաղորդագրության մեջ:

Միջոցառմանը մասնակցում էին ԱԻ նախարար Արմեն Երիցյանը, ԱԻՆ տարբեր ծառայությունների, ՀՀ մի շարք նախարարությունների, հասարակական կազմակերպությունների և գիտական հաստատությունների ներկայացուցիչներ։

ԱԻ նախարար Արմեն Երիցյանը, շնորհավորելով ծառայության աշխատակիցներին մասնագիտական տոնի կապակցությամբ, նշեց, որ Հիդրոմետ ծառայության զարգացումն Արտակարգ իրավիճակների նախարարության այս տարվա գերակա ուղղություններից մեկն է։ «Անցյալ տարի ԱԻՆ Հիդրոմետ ծառայությունը բավական լուրջ առաջընթաց է գրանցել, սակայն այս ոլորտում անելիքներ դեռ շատ կան։ Այս տարի ևս կշարունակենք քայլեր ձեռնարկել՝ ուղղված Հիդրոմետ կայանների արդիականացմանը, տեխնիկական վերազինմանը և աշխատակիցների աշխատանքային պայմանների բարելավմանը», - ավելացրեց ԱԻ նախարարը։

ԱԻՆ Հիդրոմետ ծառայության պետ Լևոն Վարդանյանը ներկայացրեց իր ղեկավարած ծառայության 2011 թ. կատարած հիմնական աշխատանքները։ «2011թ. ընթացքում շարունակվել է հիդրոօդերևութաբանական դիտարկումների գործընթացը մթնոլորտի, մակերևույթային ջրերի, հողի, գյուղատնտեսական մշակաբույսերի, ռադիացիոն մոնիտորինգի, օզոնային շերտի և ուլտրամանուշակագույն ճառագայթման ուսումնասիրությունների վերաբերյալ 47 օդերևութաբանական կայաններում և 7 հիդրոլոգիական կայանների 94 դիտակետերում: Միջազգային չափորոշիչներին համապատասխան 3 ժամը մեկ անգամ կատարվել են օդերևութաբանական դիտարկումներ բոլոր տարրերի նկատմամբ, իսկ մթնոլորտային երևույթների և եղանակի վիճակի նկատմամբ' շուրջօրյա», - նշեց պարոն Վարդանյանը։

Սևանա լճի 4 դիտակետերում կատարվել են ջրի մակարդակի, ջերմաստիճանի և սառցային երևույթների դիտարկումներ: Ամիսը մեկ անգամ էքսպեդիցիոն կարգով լճի հայելու ֆիքսված կետերում կատարվել են ստանդարտ խորությունների վրա ջրի ջերմաստիճանի, ալիքի բարձրության ու ջրի թափանցելիության չափման աշխատանքներ: Յուրաքանչյուր ամիս կազմվել է Սևանա լճի ջրի հաշվեկշիռը: Սևանա լճի 4 դիտակետերում տեղադրվել են նոր հենանիշեր և դրանց բարձրունքային նիշերը կապակցվել են ՀՀ նոր գեոդեզական ցանցին: Հաշվի առնելով Արագած բարձր լեռնային դժվարամատչելի կայանի կարևորությունը և, որ այն միակն է Կովկասյան տարածաշրջանում, որն ընդգրկված է ՀՕԿ-ի Գլոբալ Կլիմայական Դիտարկումների համակարգում, կայանում տեղադրվել և շահագործման է հանձնվել ավտոմատ օդերևութաբանական կայան, ՀՕԿ-ի ֆինանսական օժանդակությամբ իրականացվել է կայանի շենքի հիմնանորոգումը, իսկ ԱԻ նախարարի աջակցությամբ, կայանին տրամադրվել է կենցաղային գույք և տեխնիկա, ինչպես նաև վերջին մոդելի ձյունագնաց:

«Ներկայումս օրվա հրամայականն է ծառայության համալիր և լայնածավալ վերազինումը և արդիականացումը, որը հնարավորություն կտա ապահովել որակյալ, հավաստի, մեծ վաղօրոքությամբ և բարձր արդարացվածությամբ հիդրոօդերևութաբանական տեղեկատվություն», - եզրափակեց ԱԻՆ Հիդրոմետ ծառայության ղեկավարը։

Օդերևութաբանի մասնագիտական տոնի առթիվ Արտակարգ իրավիճակների նախարարը Հիդրոմետ ծառայության մի շարք աշխատակիցների պարգևատրեց «ԱԻՆ պատվավոր աշխատակից» մեդալով, ԱԻՆ պատվոգրերով և շնորհակալագրերով։