Դինքի սպանության օրը նրա հիշատակը կոգեկոչեն Ստամբուլում

Ստամբուլի հայկական «Ակոս» պարբերականի նախկին գլխավոր խմբագիր Հրանտ Դինքի սպանության օրը' հունվարի 19-ին, տեղի կունենան հիշատակի արարողություններ:

Ինչպես հաղորդում է «Արմենպրես»-ը, թուրք ռեժիսոր, գրող Ումիթ Քըվանչը համացանցում տարածել է տեսանյութ, որի մեկնաբանության մեջ նշված է. «1915 թվականի հարյուրերորդ տարին է, Հրանտ Դինքի սպանության քողարկման, ապացույցների անհայտացման, մարդասպանների պաշտպանության, հանցագործության' պետության ներսում գտնվող պատասխանատուներին թաքցնելու ութերորդ տարին»:

Դինքի հիշատակը ոգեկոչողները հայ խմբագրի սպանության օրը ժամը 13:30-ին կհավաքվեն Ստամբուլի Թաքսիմ հրապարակում, իսկ արդեն 15:00-ին կլինեն «Ակոս»-ի խմբագրատան դիմաց՝ հենց այն վայրում, որտեղ 2007 թվականին սպանվել է Դինքը:

Ստամբուլի «Ակոս» թերթի հայազգի խմբագրապետ Հրանտ Դինքը սպանվել է 2007 թվականի հունվարի 19-ին՝ խմբագրության առջև կատարված զինված հարձակման հետևանքով: 2012 թվականի հունվարի 17-ին դատարանի որոշմամբ՝ Դինքի սպանության կազմակերպիչ Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը՝ 22 տարվա ազատազրկման:

2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում է կայացրել Հրանտ Դինքի սպանության գործով դատավարությունը վերսկսել զրոյից: Այս անգամ բոլոր ամբաստանյալներին կառաջադրվի «հանցավոր խմբավորման ստեղծման և կառավարման կամ դրանում մասնակցություն ունենալու մեղադրանք: Բացի այդ, Դինքի սպանության ժամանակ բարձր պաշտոններ զբաղեցրած 9 անձանց, այդ թվում' Ստամբուլի նախկին ոստիկանապետ Ջալալեդդին Ջերահի նկատմամբ դատական գործեր հարուցելու որշումներ են ընդունվել: