«Չորրորդ ինքնիշխանություն». ՕԵԿ-ում հայ հասարակությանն անծանոթ մարդիկ են հայտնվել

ՕԵԿ-ի համամասնական ցուցակի 5-րդ հորիզոնականում հայտնվել է հայ հասարակությանը անծանոթ անուն-ազգանուն՝ Նելսոն Զուրոյանը: Այս անծանոթի շուրջ արդեն որոշակի խոսակցություններ են շրջանառվում սոցիալական ցանցերում: «ՉԻ» տեղեկություններով սույն անձնավորությունը ծագումով Լոռեցի է, եւ ինչ-որ պահից մեկնել է Ֆրանսիա՝ այնտեղ ուսում ստանալու նպատակով: Ասում են, որ բախտն այնտեղ նրան ժպտացել է, եւ վերջինս անգամ հաջողացրել է դառնալ Ֆրանսիայի քաղաքացի: «ՉԻ» տեղեկություններով նա այժմ էլ հանդիսանում է Ֆրանսիայի քաղաքացի, իսկ համաձայն ՀՀ օրենսդրության՝ օտարերկրա քաղաքացիները չեն կարող մասնակցել ՀՀ ընտրություններին:

Երեկ «ՉԻ»-ն փորձել է պարզաբանումներ ստանալ ՕԵԿ այլեւս նախկին մամլո քարտուղար Սուսաննա Աբրահամյանից: Նրանց հարցադրման պատասխանը լսելու ակնկալիքով զանգահարաում էինք նրան, երբ տեղեկացանք, որ վերջինս այլեւս կուսակցության մամլո խոսնակը չէ: Բավականին մեծ դժվարությամբ պարզեցինք, որ այդ պաշտոնում նշանակվել է Հարություն Ամիրյանը: Նրա հեռախոսաահամարը կուսակցությունում ոչ ոք չգիտեր:

Պատգամավորներից մեկն էլ «ՉԻ»-ի հետ զրույցում ասաց, որ նրան որեւէ մեկը կուսակցությունում չի ճանաչում, քանի որ վերջինս երբեւէ առնչոթյուն չի ունեցել իրենց հետ: «Նոր մարդ ա մենք չենք ճանաչում: Երեւի վաղը հանդես գա հայտարարությամբ եւ լրագրողների համար հրապարակի իր կոնտակտային տվյալները», մեզ հետ զրույցում ասաց ՕԵԿ-ականը:

Ինչ վերաբերվում է Սուսաննա Աբրահամյանին, ապա վերջինս ՕԵԿ համամասնական ցուցակում զբաղեցրել է 36-րդ հորիզոնականը, մինչդեռ ըստ իրեն, ինքն իր տարիների աշխատանքով վաստակել է գոնե 20-յակում լինելու իրավունքը: Աբրահամյանն երեկ ասել է, թե իր աշխատանքն ըստ արժանվույն չի գնահատվել, ուստի՝ ինքը որոշել է դադարեցնել իր գործունեությունը այդ պաշտոնում: Ամենայն հավանականությամբ, օրերս Սուսաննա Աբրահամյանը հանդես կգա ՕԵԿ շարքրեը վերջնականապես լքելու մասին հայտարարությամբ:

Վերադառնալով «ՉԻ» հրապարակման բուն թեմային՝ Նելսոն Զուրոյանին, թերթը ավելացնում է, որ «ՉԻ»-ն կփորձի առաջիկայում նոր պարզաբանումներով հանդես գալ: