Ռազմական ոստիկանությունն ինձնից վրեժ է լուծում. Հովհաննես Իշխանյան

Արձակագիր Հովհաննես Իշխանյանին իր «Ուվալնյատի օրը» գրքի համար հարցաքննել են Ռազմական ոստիկանությունում, ապա Երևանի Կենտրոնի քննչական բաժնում: Թե ի՞նչ հիմնավորմամբ են հարցաքննել և արդյո՞ք սա գրողին լռեցնելու միջոց է, փորձեցինք պարզել արձակագիր Հովհաննես Իշխանյանից:

«Իհարկե, այս երևույթը կարելի է որակել գրաքննություն, որովհետև իրենք ինչ-որ կասկածներ ունեին, թե այդտեղ կարող է փաստեր լինեին կամ նման բաներ լինեին։ Ես գրավոր բացատրել եմ որ չկա նման բան և որ դա ընդամենը հորինված գեղարվեստական գրականություն է»,- ասաց արձակագիրը և հավելեց, որ եթե գործը շարունակվում է և իրենք այնտեղ պոռնոգրաֆիայի, մայրերին վիրավորելու, բանակը վարկաբեկելու երևույթներ են ուզում գտնել, ուրեմն խնդիրը լրիվ այլ է։

«Իրենց հետաքրքրում է ոչ թե փաստը, այլ ինձնից վրեժ լուծելը»,- նշեց նա։

Հարցին, թե ինչի՞ համար նրանք պետք է վրեժ լուծեն իրենից, Իշխանյանն ասաց. «Պատմվածքի մեջ մի քանի նյութ բանակի մասին է, որը գրված է բանակային լեքսիկոնով, հայհոյանքներ կան և այլն: Դա իրենց դուր չի եկել, և նրանք հավանաբար ցանկացել են վատություն անեն»:

Իշխանյանի խոսքերով՝ սա ոչ միայն խոսքի ազատության սահմանափակում է, այլ ստեղծագործական մտքի սահմանափակում։

«Սա վերադարձ է դեպի ցենզուրա, ինչից մեզ թվում էր՝ պրծել ենք, բայց պարզվում է՝ ոչ»,- ասաց արձակագիրը։ 

Անդրադառնալով «Բուկինիստ» գրախանութից իր գիրքը վաճառքից հանելու փաստին՝ արձակագիրը նշեց, որ դա առանց իրեն տեղեկացնելու է եղել և ավելացրեց, որ գիրքը վերջերս վաճառքից հանվել է նաև «Բյուրոկրատ» գրախանութից:

«Ես իմացել եմ, որ ՌՈ-ի ճնշման տակ են գրախանութները գրքերը վաճառքից հանում։ Այսինքն՝ նրանք միջամտում են, որոշում. թե գրախանութում որ գիրքը պետք է վաճառվի, իսկ որը՝ ոչ»-ասաց նա:

Իսկ ունի՞ արդյոք ՌՈ-ը նման միջամտության իրավունք, արձակագիրն ասաց. «ՌՈ-ն ընդհանրապես իրավունք չունի քաղաքացիական անձով զբաղվելու: ՌՈ-ի գործը զինվորականներն են, նրա գործը բանակն է, ոչ թե քաղաքացին, և շատ հնարավոր է, որ հենց դրա համար էլ գործը տեղափոխվեց կենտրոնական քննչական։ Այսինքն՝ ոչ թե տեղափոխվեց, այլ ինձ հետո այնտեղից էլ կանչեցին»:

Իշխանյանը ՌՈ-ի տրամադրվածությունից ենթադրում է, որ քննությունը շարունակվում է: «Սկզբում մտածում էի՝ չի շարունակվի, որովհետև ոչ մի հիմք չկա ինչ-որ բան շարունակելու, բայց եթե իրենք այդպես տրամադրված արդեն մի քան անգամ կանչում են ինձ ու տրամադրված են գործ հարուցել, ուրեմն քննությունը դեռ շարունակվում է»,-ասաց արձակագիրը:

Հիշեցնենք, որ Facebook սոցիալական ցանցի մի խումբ օգտատերեր Հովիկ Չարխչյանի նախաձեռնությամբ տարածել են հայտարարություն, որտեղ պահանջում են դադարեցնել հալածանքներն արձակագրի նկատմամբ.

«Մենք թույլ չենք տա, որ Հայաստանը խավարի մատնելու ոստիկանության փորձերն իրականանան: Պահանջում ենք անհապաղ դադարեցնել հալածանքները Հովհաննես Իշխանյանի նկատմամբ»,-ասված է հայտարարության մեջ:

Գայանե Համբարձումյան