Մաշտոցյան «սրբազան մարգարիտներով» համալրող բացառիկ հրատարակությամբ ձայներիզի շնորհանդեսը

Երբ Մայր Աթոռը տոնում է Մեսրոպյան գրերի գյուտի և Սուրբ գրքի հայերեն թարգմանության 1600-ամյակը, իսկ համայն հայությունը նշում է Մեսրոպ Մաշտոցի ծննդյան 1650-րդ տարեդարձը, «Նարեկացի» արվեստի միությունը` Վահան Արծրունու և Հասմիկ Բաղդասարյանի հետ համատեղ, ներկայանում են հայոց հավաքական ձայնադարանը մաշտոցյան «սրբազան մարգարիտներով» համալրող բացառիկ հրատարակությամբ. առաջինն, ըստ էության, որ մեկ արտեֆակտի մեջ մեկտեղում է Մաշտոցի շարականների մեզ հասած ոչ մեծ ժառանգության հավաստի բոլոր 11-ը:

Վահան Արծրունու մեկնությամբ ու Հասմիկ Բաղդասարյանի կատարմամբ` «Մաշտոց. սրբազան մարգարիտներ» նոր ու ուշագրավ այս զայնասկավառակը «Նարեկացի» արվեստի միության թվով 35-րդ հրատարակությունն է` 3-րդ այսօրինակ համագործակցությունը Վահան Արծրունու հետ և 2-րդը` Հասմիկ Բաղդասարյանի հետ:  

Լինելով հայոց ինքնության գլխավոր կատալիստը` Մեսրոպյան գրերի գյուտը նաև հայկական մելոսի արարման առհավատչյան էր, որ հնարավոր դարձրեց հայ ժողովրդական ասերգության ու հոգևոր երաժշտության հայացումը` դրանց համահնչեցումն ու ներդաշնակեցումը հայոց լեզվի հնչերանգային առանձնահատկությունների ու եղանակային նրբերանգների հետ: Գրերի գյուտը նաև ավետեց եկեղեցու ծիսական արարողակարգի ու հոգևոր երգեցողության հայացման մեկնարկը, որի ակունքներում վերստին կանգնած է Մաշտոցն իր հեղինակած շուրջ 130 չափածո գործերով, որ կաթողիկոս Սահակ Պարթևի հետ փոխադրվել են երաժշտական ձևի ու զետեղվել եկեղեցիական Շարակնոցում: Մաշտոց-պարթևյան շարականների հարուստ ժառանգությունը գրեթե չի պահպանվել. կան տարբեր աղբյուրներում պահպանված 30 վիճելի շարական, որ երաժշտագիտական հետազոտությունները վերագրում են Մաշտոց-Պարթև տանդեմին, ու մեզ են ավանդվել ընդամենը 11 շարական, որոնց ինքնությունը հավաստի է ու անվիճելի:

Ներկայացվող նախագծի առանցքում հենց այդ 11 միաձայն շարականներն են, որ բազմաձայնեցնելով ժամանակակից ձայնագրման և սեմպլերային տեխնոլոգիաների համադրությամբ` Վահան Արծրունին ներկայացնում է հեղինակային մեկնությամբ:

Զայնասկավառակի պաշտոնական շնորհանդեսը նախատեսված է հոկտեմբերի 8-ին` ժամը 20:00-ին, «Նարեկացի» արվեստի միության երևանյան կենտրոնում: