Աֆղանստանը շարունակում է մնալ աշխարհի ամենահետամնաց երկիրը. Համիդ Քարզայ

Աֆղանստանը շարունակում է մնալ աշխարհի ամենահետամնաց երկիրը։ Այս մասին այսօր հայտարարել է Աֆղանստանի հանրապետության նախագահ Համիդ Քարզայը՝ ելույթ ունենալով Քաբուլում նոր ուսումնական տարվա սկզբի կապակցությամբ կազմակերպված հանդիսավոր արարողության ժամանակ, հայտնում է РИА Новости-ն։

«Չնայած որ մենք զգալի նվաճումների ենք հասել տնտեսության որոշ ճյուղերում, սակայն մենք նախկինի պես գտնվում ենք զարգացման ճանապարհի սկզբնական փուլում և անհրաժեշտ է ջանք չխնայել բնականոն զարգացումն ապահովելու համար», – ասել է Աֆղանստանի նախագահը։

Նրա խոսքերով՝ Աֆղանստանում կրթական համակարգին զգալի վնաս են հասցրել շուրջ 30 տարի ընթացող ռազմական գործողությունները, և գրեթե 2 սերունդ զրկված են եղել սովորելու հնարավորությունից։ Քարզայը կոչ է արել աֆղան երիտասարդներին ջանասիրաբար ուսանել հատկապես օտար լեզուները։