Քեսաբում իրավիճակը հանգիստ է. Կարո Մանճիկյան

Քեսաբում երկու շաբաթից ավելի տևած բուք ու բորանից հետո ձնհալ է սկսվել: Այս մասին «Արմենպրես»-ի հետ զրույցում նշեց Սփյուռքահայության շտապ օգնության գործադիր մարմնի անդամ Կարո Մանճիկյանը՝ ավելացնելով, որ մի քանի օր Քեսաբը հոսանքազրկված է եղել: Նրա խոսքով' իրավիճակը լավ է, հանգիստ, բախումներ չկան: «Պետությունն ավելի է ուժեղացրել Քեսաբի անվտանգության ապահովումը»,- նշեց նա:

Ինչ վերաբերում է դեկտեմբերի վերջին թուրք-սիրիական սահմանին նկատված շարժումներին, Մանճիկյանը նշեց, որ տարաձայնություններն անցել են, սակայն ստեղծված փոքր-ինչ լարվածությունը ազդել է մարդկանց տոնական օրերի տրամադրությունների վրա:

Ավելի վաղ՝ դեկտեմբերին, լուրեր էին հասել Քեսաբ' թուրքական սահմանին ինչ-որ շարժումներ նկատվելու մասին: Այդ առիթով Կարո Մանճիկյանը նշել էր, որ Քեսաբում մտահոգիչ որևէ դեպք տեղի չի ունեցել, սակայն ապահովության համար փոքրերին և տարեցներին տեղափոխել են Լաթաքիա:

Քեսաբը սիրիական բանակի կողմից ազատագրվել է հունիսի 15-ին, և բնակչության մեծ մասը վերադարձել է այնտեղ: Քեսաբի բոլոր հաստատությունները, տները և բնակարանները, առանց բացառության, վնասներ էին կրել:

Քեսաբի շրջանի վրա հարձակումն սկսվել էր մարտի 21-ին՝ Թուրքիայի սահմանի ութ կետից: Հարձակումն իրականացրել էին «Ջաբհա ան Նուսրա» և «Ջեյշ ալ Իսլամ» խմբավորումները՝ Թուրքիայի կառավարության անմիջական աջակցությամբ: