Բողոքի ցույցեր Պակիստանում

Պակիստանի իշխանությունների կողմից Աֆղանստան ՆԱՏՕ-ի ուժերին բեռներ մատակարարելու համար իր տարածքը կրկին տարանցիկ ճանապարհ դարձնելու թույլտվությունը, ժողովրդի փողոց դուրս գալու պատճառ է դարձել։

Կարաչի և Լահոր քաղաքներում կազմակերպված ցույցերի ժամանակ հակաամերիկյան կոչեր են հնչել, հաղորդում է BBC–ն։

Հիշեցնենք, որ անցյալ նոյեմբերին Աֆղանստանում գտնվող ՆԱՏՕ–ի կործանիչները ռմբակոծել էին Պակիստանի սահմանին գտնվող ոստիկանական անցակետը, ինչի հետևանքով 24 պակիստանցի զինվոր էր զոհվել։ 

ՆԱՏՕ-ի հրամանատարությունը հայտարարել էր, որ դա սխալմունք է եղել, սակայն Պակիստանի իշխանությունները փակել էին ՆԱՏՕ–ի զորքերին բեռներ մատակարարելու տարանցիկ ճանապարհը։

Սակայն վերջին օրերին Պակիստանի իշխանությունների կողմից տարանցիկ ճանապարհը վերաբացելու վերաբերյալ տեղեկությունների պատճառով ժողովրդի մոտ դժգոհության ալիք է բարձրացել։

Նշենք, որ Աֆղանստանում ՆԱՏՕ–ի զորքերին մատակարարվող բեռների մեկ երրորդը տեղափոխվում է Պակիստանի տարածքով։