Ազդեցիկ պետությունները, որոնք մեծ քանակությամբ զենք ունեն, չպետք է թալանեն մյուսներին. Ահմադինեժադ

«Երկրագնդի վրա դեռևս շարունակվում է այլ պետությունների բնական ռեսուրսների թալանի գործընթացն այն երկրների կողմից, որոնք ունեն ավելի շատ զենք և քաղաքական կշիռ»,– հայտարարել է Իրանի նախագահ Մահմուդ Ահմադինեժադը՝ հանդես գալով Դուշանբեում անցկացվող «Նավրուզ-2012» միջազգային համաժողովում։

Իրանի նախագահի խոսքերով՝ Նավրուզի տոնախմբությունները հիանալի հնարավորություններ են ստեղծում տարածաշրջանում և նույնիսկ ամբողջ աշխարհում կայունության, խաղաղության և բարեկամության ամրապնդման համար։ Ահմադինեժադը Նավրուզն անվանել է խավարի նկատմամբ լույսի հաղթանակի, արդարության և բարեկամության տոն։

Համաժողովին մասնակցում են Աֆղանստանի, Իրանի, Պակիստանի, Տաջիկստանի ղեկավարները, ինչպես նաև ներկայացուցչական պատվիրակություններ Ադրբեջանից, Ղազախստանից, Ղրղզստանից, Չինաստանից և Թուրքմենստանից։ 2013 թ.-ի Նավրուզի մայրաքաղաք է ընտրվել Աշխաբադը, իսկ 2014-ին՝ Քաբուլը, հայտնում է ИТАР-ТАСС–ը։