Հայ գրատպության 500-ամյակին նվիրված՝ հայկական հնատիպ գրքերի ցուցահանդեսներ արտերկրում

Հայ տպագիր գրքի 500-ամյակին նվիրված տոնակատարությունների համատեքստում 2012 թ. ապրիլ ամսին Գերմանիայի Դաշնությունում, Դանիայում և ԱՄՆ-ում կայանալու են հայ գրքին և գրատպությանը նվիրված ցուցահանդեսներ, այդ թվում.

Ս. թ. ապրիլի 15-ին Գերմանիայի Սաքսոնիա-Անհալթ երկրամասի մշակույթի նախարարության, Հայաստանի Հանրապետության մշակույթի նախարարության, Գերմանիայում ՀՀ դեսպանության նախաձեռնությամբ Հալլե քաղաքի «Kunstforum» սրահում կբացվի «Տառարվեստ և պատկերի հրաշքը. Հայ գրատպության 500-ամյակ» խորագրով ցուցահանդեսը: Ցուցահանդեսում կներկայացվեն Գերմանիայի տարբեր մշակութային ու գիտական հաստատություններում պահվող հնատիպ գրքեր, ինչպես նաև ցուցանմուշներ Մ. Մաշտոցի անվան հին ձեռագրերի գիտահետազոտական ինստիտուտ - Մատենադարանից, Հայաստանի ազգային գրադարանից և Երևանի Հովհաննես Շարամբեյանի անվան ժողովրդական արվեստի թանգարանից:

Ս. թ. ապրիլի 17-ին Կոպենհագենի «Black Diamond» թագավորական գրադարանում կբացվի «Հայաստան… գրքի ճանապարհ» խորագրով ցուցահանդեսը: Ցուցահանդեսի կազմակերպիչներն են ՀՀ մշակույթի նախարարությունը, Դանիայում ՀՀ դեսպանությունը և Կոպենհագենի թագավորական գրադարանը: Ցուցահանդեսին կներկայացվեն Կոպենհագենի թագավորական գրադարանում պահվող հայատառ և Հայաստանի մասին պատմող հնատիպ գրքերը: Ցուցադրությունը կհարստացվի Հայաստանի ազգային գրադարանի հնատիպ գրքերի հավաքածուից ևս: Ցուցահանդեսի բացմանը կհաջորդի համերգային ծրագիր:

Ս. թ. ապրիլի 18-ին ԱՄՆ Կոնգրեսի գրադարանում ԱՄՆ-ում ՀՀ դեսպանության, Կոնգրեսի գրադարանի տնօրինության նախաձեռնությամբ՝ կբացվի «Իմանալ հայ գրական ավանդույթների իմաստն ու մանրամասները» խորագրով ցուցահանդեսը: