Թուրքիայում Facebook-ը և Twitter-ը կարգելափակվեն

Թուրքիայի մայրաքաղաք Անկարայի Գյոլբաշը վարչական դատարանի որոշման համաձայն՝ այդ երկրում մասնակիորեն կարգելափակվեն մի շարք սոցիալական ցանցեր, այդ վթում' Twitter-ը և Facebook-ը: Այս մասին, ինչպես հաղորդում է «Արմենպրես»-ը, հայտնում է թուրքական «Միլիեթ» թերթը:

Նշվում է, որ դա պայմանավորված է այն բանով, որ որոշ սոցցանցերում Մուհամեդ մարգարեին վիրավորող ծաղրանկարներ են հրապարակվել և գրառումներ արվել: Բացի այդ, անցյալ տարեվերջին սոցցանցերում Թուրքիայի հետախուզական կազմակերպության (MIT) կողմից Սիրիայի կառավարական ուժերի դեմ կռվող ապստամբներին և ահաբեկչական խմբավորումների զինյալներին զենք և սպառազինություն ուղարկվելու կասկածներն ապացուցող նյութեր են հրապարակվել: Մասնավորապես, տեսագրություն էր տարածվել Սիրիա զենք տեղափոխող Թուրքիայի MIT-ի մի քանի բեռնատարներ Ադանայում կանգնեցվելու և խուզարկվելու մասին:

Անցյալ տարվա մարտի 21-ին թուրքական դատարանի որոշմամբ արգելափակվել էր Twitter սոցիալական ցանցը: Ապրիլի 5-ին արգելափակվել էր Youtube սոցիալական ցանցը: 2014 թվականի մարտի 27-ին Youtube-ում տարածվել էր Սիրիայում իրադրությանը նվիրված գաղտնի խորհրդակցության ձայնագրությունը, որին մասնակցել են Թուրքիայի զինված ուժերի Գլխավոր շտաբի և հետախուզության ղեկավարները: Դրանից հետո Թուրքիայում Youtube սոցցանց մուտքն արգելափակվել էր: