«Երկիր». Սևանի ձուկը քամել են

«2011–ին պետական բյուջեից հատկացվել է 60 մլն դրամ Սևանում 166,7 հազար 5 գրամանոց գեղարքունի և 200 հազար 3 գրամանոց ամառային իշխանի մանրաձուկ բաց թողնելու համար։

«Երկիր»–ի թղթակիցը, զրուցելով Գեղարքունիքի մարզի մի քանի ձկնորսների հետ, պարզել է, որ ձուկը խիստ պակասել է կամ ավելի ճիշտ՝ չկա։ «Քամվել է ձուկը Սևանից, քամվել»,– ասել են ձկնորսները և հավելել, որ թեև ամեն նավակի համար կանոնավոր վճարումներ են անում՝ «ծով դուրս գալու համար», այնուամենայնիվ, որս չկա։

Մեկ այլ տեղեկության համաձայն՝ Սևանի ձկնորսները, իրոք, յուրաքանչյուր նավակի համար մուծում են 30–40 հազար դրամ, որ կարողանան մուտք ունենալ լիճ։ Համաձայն մեր տեղեկությունների՝ ձկնորսները այդքան գումարը մուծելով, կարող են մեկ կամ մեկուկես ամիս ամեն օր լիճ դուրս գալ։ Ավելին՝ երբ ազգային պարկի տեսուչներն առգրավում են ձկնորսական ցանցերը և համապատասխան պարագաները, դրանք հետո դարձյալ վաճառում են նույն ձկնորսներին։

Նախկինում, երբ վերահսկողություն ընդհանրապես չկար, ամեն օր Սևան էր դուրս գալիս 400 նավակ, իսկ այսօր դրանց թիվը մոտ 100 է, այսինքն՝ պարզ մաթեմատիկական հաշվարկներով՝ ամեն ամիս «Սևան ազգային պարկը» մոտ 3 մլն դրամ գումար է «կպցնում» օդից։

Ըստ ասեկոսեների՝ գործարքն իրականացվում է «Սևան ազգային պարկ» ՊՈԱԿ–ի պահպանության պետ Կարեն Մալխասյանի / մականունը՝ Եզո/ գիտությամբ։

ՀՀ բնապահպանության նախարարությունում մեզ հայտնեցին, որ նման տեղեկություններ չունեն, և ներկա պահին արդյունագործական ձկնորսությունն արգելված է, թույլատրվում է միայն խեցգետնի որսը, թեև Սևանում կրճատվել են նաև խեցգետնի ծավալները։

ՀՀ ԳԱԱ հիդրոէկոլոգիայի ձկնաբանության ինստիտուտի տնօրեն Բարդուխ Գաբրիելյանի հավաստմամբ՝ 2009–2010 թթ. իրենց ուսումնասիրությունների համաձայն՝ Սևանում զգալիորեն պակասել են ձկնապաշարները։ «Իսկ եթե այս սեզոնին շուկայում մի քանի հատ ձուկ կա, պատճառն այն է, որ հիմա ձվադրման սեզոն է, ձուկը բարձրանում է դեպի գետեր։ Դա էլ թող հանեն ու պրծնեն»,– ասաց նա։

Զարմանալի է՝ այդ դեպքում ամեն տարի ի՞նչ թվեր է ներկայացնում բնապահպանության նախարարը, եթե ամեն երկու տարի անընդմեջ ԳԱԱ–ն արձանագրում է, որ Սևանում ձկնապաշարները զգալիորեն պակասել են»,– գրում է թերթը։