Հայաստանը «Եվրանեստ»–ին կմասնակցի Ղարաբաղյան հարցին վերաբերող ասելիքով

Պատգամավոր Հովհաննես Սահակյանը կարծում է, որ ապրիլի 2-4-ին Բաքվում կայանալիք «Եվրանեստի» Խորհրդարանական ժողովի 2-րդ լիագումար նիստը կարևոր է նրանով, որ Հայաստանի պատվիրակությանը կհաջողվի տեղում չեզոքացնել հնարավոր ոչ հայանպաստ բանաձևերը։ Պատգամավորը, ով նաև Հայաստանի պատվիրակության անդամ է, նշեց, որ Հայաստանը բաց է բանակցությունների համար և նիստին մասնակցելու է ոչ միայն «Եվրանեստի», այլև՝ ղարաբաղյան հարցի առնչությամբ ասելիքով։

Լուրեր.com-ի հարցին, թե արդյոք ղարաբաղյան հարցի առնչությամբ ասելիքը վերաբերելու է ԼՂՀ–ն որպես բանակացային կողմ ներգրավելուն, Սահակյանը պատասխանեց, թե այս հանդիպման շրջանակներում նման սուր հարցեր չեն ներկայացվելու։

«Վեհաժողովի այս ֆորմատը ընդամենը մի ձևաչափ է, որով մենք ավելի արագ պետք է ինտեգրվենք Եվրոպական ընտանիքին», – նշեց պատգամավորը՝ հավելելով, որ իրենց ջանքրով ընդունվել է մի բանաձև, ըստ որի «Արևելյան գործընկերության ձևաչափը չի զբաղվում կոնֆլիկտների լուծման խնդիրներով»։

Ըստ պատգամավորի՝ այս վեհաժողովի աշխատանքները ավելի շատ ուղղված են քաղաքացիական հասարակությունների մերձեցման գործընթացներին։ Պատգամավորը հիշեցրեց, որ նման բանաձևերի քննարկումը հայակական կողմը արդեն մեկ անգամ կասեցրել է  նախորդ լիագումար նիստի ընթացքում՝ օգտվելով վետոյի իրավունքից, երբ ադրբեջանական ու վրացական կողմերը փորձում էին ներկայացնել և հաստատել մի բանաձև, որտեղ նշված էր պետությունների տարածքային ամբողջականությունը հարգելու դրույթը։ 

Նշենք նաև, որ ադրբեջանական կողմը տվել է հայակական պատվիրակության անվտանգության գրավոր երաշխիքը։ Ըստ Հովհաննես Սահակյանի՝ հայկական պատվիրակությանը, մամուլում տարածված տեղեկությունների համաձայն, «ջերմորեն» դիմավորելու են ադրբեջանի ազգայնականները՝ Ադրբեջանի ազգային ճակատի գլխավորությամբ։ Նման ընդունելությանը, պատգամավորի վստահեցմամբ, իրենք պատրաստ են։