Սիրիայի ընդդիմության ռազմական խմբավորումները միավորվելու են մեկ ընդհանուր հրամանատարության ներքո

Սիրիական ընդդիմության ռազմական թևի՝ այսպես կոչված «Սիրիական անկախ բանակի» խմբավորումները միավորվելու են մեկ ընդհանուր հրամանատարության ներքո։ Այսօր այս մասին գրել է թուրքական «Սաբահ» օրաթերթը՝ հղում կատարելով Սիրիական անկախ բանակի (ՍԱԲ) հրամանատար Ռիյադ Ասադին։

«ՍԱԲ–ի կազմում, որի ընդհանուր թվաքանակը հայտնի չէ, ներկայումս հաշվվում է մոտ 10 գեներալ և 19–ը զինծառայող՝ գնդապետի կոչումով, որոնք փախուստի են դիմել Սիրիայից և հաստատվել Թուրքիայի տարածքում»,– նախօրեին լրագրողների հետ հանդիպմանը հայտարարել է Թուրքիայի վարչապետ Թայիպ Էրդողանը։

Թուրքիայում Սիրիայից ժամանած փախստականների ընդհանուր թիվը մարտի 26-ի դրությամբ գերազանցում է 18 հազարը։ Թուրքական իշխանությունները չեն բացառում, որ սիրիացի փախստականների թիվը մոտ ժամանակներս կարող է գերազանցել 100 հազարը։