Եգիպտոսում ստորագրություններ են հավաքում Մուբարաքին երկրի նախագահի թեկնածու առաջադրելու համար

Եգիպտոսի նախկին նախագահ Հոսնի Մուբարաքի կողմնակիցները շուրջ 17 հազար ստորագրություն են հավաքել՝ նրա թեկնածությունը երկրի նախագահական ընտրություններին առաջադրելու օգտին, հայտնում է РИА Новости–ին։

Նրա թեկնածությունն առաջադրելու համար անհրաժեշտ է հավաքել 30 հազար ստորագրություն և հանձնել անհրաժեշտ փաստաթղթերը Բարձրագույն ընտրական հանձնաժողով մինչև մարտի 30-ը։ Եգիպտոսի յուրաքանչյուր քաղաքացի իրավունք ունի իր ստորագրությունը տալ միայն մեկ թեկնածուի օգտին։

Միևնույն ժամանակ Մուբարաքի կողմնակիցները կարծում են, որ վերջինս դժվար թե ցանկություն հայտնի մասնակցել Եգիպտոսի նախագահական ընտրություններին։ Այնուամենայնիվ, ստորագրությունների հավաքագրման գործընթացը նրանք կարևոր են համարում՝ այն դիտելով ավելի շատ իբրև խորհրդանշական քայլ։ «Մենք դա անում ենք բացառապես ի նշան մեր երախտագիտության և Մուբարաքի հանդեպ մեր ունեցած հարգանքի», – ասված է Եգիպտոսի նախկին նախագահի կողմնակիցների ֆեյսբուքյան էջում զետեղված հաղորդագրության մեջ։