ՄԻՊ հայաստանյան գրասենյակն անզոր է պաշտպանել մարդու իրավուքները. Լևոն Բարսեղյան

Ժուռնալիստների «Ասպարես» ակումբի նախագահ Լևոն Բարսեղյանը հրաժարվեց մեկնաբանել ՄԻՊ Կարեն Անդրեասյանի՝ այսօր հրապարակված զեկույցը Հեռուստատեսության և ռադիոյի ազգային հանձնաժողովի մշտադիտարկման արդյունքների վերաբերյալ։ Ըստ նրա՝ մարդու իրավունքների պաշտպանության հայաստանյան գրասենյակն անզոր է Հայաստանում պաշտպանել մարդու իրավուքները։ 

Ինչ վերաբերում է հեռուստաեթերի հավասար բաշխմանը քաղաքական ուժերի միջև, որն, ըստ Անդրեասյանի, չի պահպանվել, ակումբի ղեկավարը նշեց, որ այդ համամասնությունը նախընտրական փուլում որոշ չափով պահպանվում է։

«Նախընտրական փուլում, հեռուստատեսությունները, իմանալով, որ կան զանազան դիտարկումներ (օրինակ՝ Երևանի մամուլի ակումբինը), իրենք ջանում են թեկնածուներին կամ թեկնածու կուսակցություններին տրամադրվող ժամաքանակը հավասարեցնել, իսկ թեկնածուներին տրամադրվող ժամաքանակի որակը շարունակում է մնալ «անարդար»», – կարծում է Բարսեղյանը։

Ըստ նրա՝ այդ անարդարությունը դրսևորվում է նրանում, որ իշխանության մարդիկ, որոնք միաժամանակ պաշտոնյաներ են և թեկնածուներ, շահեկան դիրքերում են, քանի որ նրանց պաշտոնական գործունեությունը նույնպես լուսաբանվում է։

«Զանազան բացումներ, փակումներ, ժապավեն կտրել, հանիդսություններ, բանտիկներով–ֆանտիկնրով միջոցառումների մասնակցելը... Ես սա որոշ դեպքերում կոչում եմ վարչական ռեսուրսի չարաշահում, ինչը արտացոլվում է հեռուստառադիոեթերում», – նշեց նա։ 

«Այն, որ 60 հեռուստատեսություններից և ռադիոկայաններից միայն 15–ն են քաղաքական գովազդի գներ հայտարարել, իսկ 45–ը չեն հայտարարել,  այսինքն՝ քաղաքական գովազդի պատվերներ չեն ստանալու և քաղաքական գովազդ չեն հեռարձակելու, խոսում է այն մասին, որ այս լրատվամիջոցները այդքան էլ ազատ չեն դա անելու», – զրույցի ավարտին նշեց Լևոն Բարսեղյանը՝ համոզմունք հայտնելով, որ նման որոշում կայացնելու հարցում այդ հեռուստաընկերություններին «խստորեն օգնել են»։