Էրդողանի որդուն և դստերը պատգամավորներ են դարձնում՝ չդատելու համար

Թուրքիայի նախագահ Ռեջեփ Թայիփ Էրդողանն աշխատում է իր որդուն' Բիլալին և դստերը' Սումեյային անձեռնմխելիություն ապահովել, որպեսզի իրավապահներին զրկի նրանց դեմ հետաքննություն անցկացնելու հնարավորությունից' կապված 2013 թվականի դեկտեմբերի 17-25-ին Թուրքիայում բացահայտված կոռուպցիոն սկանդալին նրանց մասնակցության հետ:

Այս մասին, ինչպես հաղորդում է «Արմենպրես»-ը' վկայակոչելով թուրքական DemokratHaber լրատվական կայքը' հայտարարել է Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) փոխնախագահ Բյուլենթ Թեզջանը' նշելով, որ Էրդողանը ցանկանում է Թուրքիայում առաջիկա հունիսին անցկացվելիք խորհրդարանական ընտրություններում իր որդու և դստեր համար պատգամավորական մանդատ ապահովել:

Կայքը հայտնում է, որ Թուրքիայի իշխող «Արդարություն և զարգացում» կուսակցության (ԱԶԿ) փոխնախագահ Սուլեյման Սոլուն դեռևս անցյալ ամիս հայտարարել էր, որ «լավ կլիներ, եթե Սումեյա Էրդողանը պատգամավոր ընտրվեր», ինչից հետո ԱԶԿ-ում սկսել են հող նախապատրաստել Էրդողանի դստերը խորհրդարանական ընտրություններում պատգամավորության թեկնածու առաջադրելու համար:

Այդ հայտարարությունը Թեզջանն արել է Այդընի Քուշադասը քաղաքում գիտնականների հետ ունեցած մի հանդիպման ժամանակ: «Դեկտեմբերի 17-25-ի ապօրինությունների հետաքննության գործընթացից հետո Էրդողանի որդու և դստեր անձեռնմխելիության խիստ կարիք կա: Նրանց պատգամավորական մանդատով ապահովելու ուղղությամբ լուրջ աշխատանքներ են սկսվել»,- ասել է նա:

2013 թվականի դեկտեմբերի 17-25-ի ապօրինությունների և կաշառքի բացահայտման գործողությունների շրջանակում հրապարակվել էին նաև Սումեյա և Բիլալ Էրդողանների կոռուպցիոն գործարքների մասին հեռախոսազրույցների ձայնագրությունները: Բիլալն ու Սումեյան այն ժամանակ խուճապի էին մատնվել և Էրդողանի հետ հեռախոսազրույցներով խորհրդակցելուց հետո «զրոյացրել» իրենց հարյուր միլիոնավոր դոլարների հասնող կանխիկ գումարները:

Այդ բացահայտումից շոկի մեջ հայտնված Էրդողանն աշխատանքից ազատել էր կոռուպցիոն գործարքների մասնակից իր 10 նախարարներին: Սակայն այն բանից հետո, երբ հանրությունն սկսել էր պահանջել կառավարության ամբողջ կազմի հրաժարականը, Էրդողանը հայտարարել էր, որ դրա հետևում կանգնած են արդի իսլամի գաղափարախոս Ֆաթուլլահ Գյուլենի հետևորդները, որոնք ցանկանում են տապալել իր կառավարությունը: Էրդողանը Գյուլենի հետ համագործակցելու «մեղադրանքով» աշխատանքից հեռացրել է կոռուպցիոն սկանդալը բացահայտած 1000-ից ավելի իրավապահի, դատախազի և դատավորի: