Միշտ էլ կարելի է փայտ գտնել, որ շանը ծեծես. ՀՀԿ–ական պատգամավորը Բագրատյանի նամակների մասին (Տեսանյութ)

 ՀՀԿ խմբակցության պատգամավոր Հովհաննես Սահակյանը, Լուրեր.com-ի հետ զրույցում անդրադառնալով նախկին վարչապետ Հրանտ Բագրատյանի բաց նամակներին, կոչ արեց բոլոր քաղաքական ուժերին լինել կոռեկտ և քարոզարշավը տանել կոռեկտության սահմաններում՝ անկախ նրանից՝ դա տնտեսական ձևաչափով քննադատություն է, թե՝ քաղաքական։ Այդ կարծիքը նա հայտնեց ի պատասխան լրագրողի այն հարցի, թե ինչպես նա կմեկնաբանի նախկին վարչապետ Խոսրով Հարությունյանի ընդգրկվելը ՀՀԿ համամասնական ցուցակում, ում վարչապետ լինելու տարիներին ՀՀ տնտեսությունը զգալի անկում է ապրել։

«Բոլորս ապրել ենք Հայաստանի հանրապետությունում, տեսել ենք թե Հրանտ Բագրատյանի շրջանում ինչ տնտեսական «հաջողություններ» ենք ունեցել, և եթե դա կարելի է անվանել հաջողություն, ապա ես չակերտները կհանեի», – ասաց պատգամավորը՝ մյուս կողմից նշելով Սերժ Սարգսյանի և Անդրանիկ Մարգարյանի ղեկավարած կառավարության գրանցած հաջողությունները։ 

Հովհաննես Սահակյանն այս առիթով հիշեց ժողովրդական մի առած, թե «միշտ էլ կարելի է փայտ գտնել, որ շանը ծեծես»։