Թուրքիայում ԱՄՆ նոր դեսպանը խոսել է Հայոց ցեղասպանության մասին

Թուրքիայում ԱՄՆ-ի նորանշանակ դեսպան Ջոն Բասը հայտարարել է, որ ինքը չի կարող ասել, թե ԱՄՆ Նախագահ Բարաք Օբաման հայ ժողովրդին ուղղված ապրիլքսանչորյան ուղերձում ինչ եզրույթով կբնորոշի 1915 թվականի իրադարձությունները:

Ինչպես հաղորդում է «Արմենպրես»-ը, թուրքական NTV հեռուստաալիքին տված հարցազրույցում Բասն ասել է, որ 1915 թվականին տեղի ունեցած կոտորածների ու ողբերգությունների փաստերի ընդունումն «օգտագակար կլինի և՛ թուրքերի, և՛ հայերի, ինչպես նաև նրանց սերունդների համար»:

Պատասխանելով Հայոց ցեղասպանության 100-ամյա տարելիցի հետ կապված պաշտոնական Վաշինգտոնի դիրքորոշման մասին հարցին, դեսպանն ասել է, որ չի կարող մեկնաբանել, թե ինչ արտահայտություն կընտրեն ԱՄՆ նախագահը կամ Կոնգրեսը այդ իրադարձությունները բնորոշելու համար: Նա նշել է, որ 1915թ. իրադարձությունների հարցում ԱՄՆ քաղաքականությունը չի փոխվել:

«Մեր քաղաքականությունն այն է, որ թե՛ Թուրքիայի, թե՛ Հայաստանի քաղաքացիների համար օգտակար կլինի 1915 թվականին տեղի ունեցած սարսափելի կոտորածներն և ողբերգություններն ընդունել ճիշտ և արդար կերպով», -ասել է նա:

Անդրադառնալով Գալիպոլիի ճակատամարտի 100-ամյակի հետ կապված թուրքական կողմի հրավերին, Բասը նշել է, որ «դեռ վաղ է ասել, թե պաշտոնական ինչպիսի մակարդակով ԱՄՆ-ը կմասնակցի այդ միջոցառմանը»:

Նա ընդգծել է, որ Թուրքիան ԱՄՆ-ի «ամենակարևոր գործընկերներից» մեկն է: