Թուրքիայում Հայոց ցեղասպանության մասին նոր գիրք է հրատարակվել

Թուրքիայում հրապարակվել է «100-ամյա հոգոց. Դիարբեքիրը հավաքական հիշողության հետքերով՝ 1915» անվանմամբ գիրք, որը պատմում է Հայոց ցեղասպանության մասին:

Ինչպես հաղորդում է «Արմենպրես»-ը, գրքի հղինակներ Ադնան Չելիքն ու Նամըք Քեմալ Դինչը թուրքական «Ռադիկալ»-ի հետ զրույցում ասել են, որ գրքում կենդանի վկայություններ են հավաքել 100 տարի առաջ Դիարբեքիրում (Տիգրանակերտ) հայերի կոտորածների մասին:

Նրանք նշել են, որ անգամ 100 տարի անց, քաղաքի ժողովուրդը հայերի կոտորածների մասին պատմում է այնպես, կարծես այդ ամենը երեկ է տեղի ունեցել: Նրանց խոսքով՝ Դիարբեքիրի քրդերը հայերի կոտորածները բնութագրում են որպես «ոչնչացում», «արմատը չորացնել», «ոչնչացման շրջան» և այլն:

Վկայություններում քրդերը գովեստով են խոսել հայերի ստեղծագործ ազգ լինելու, հայ մտավորականների, ակտիվիստների գործունեության, նրանց իշխանությունից օգտվելու, ինչպես նաև հայերի մշակույթից քրդերի ազդվելու մասին:

Քրդերը պատմել են, որ բոլոր կոտորածներից առաջ թուրքերը կեղծ լուրեր էին տարածում, թե հայերը պետք է հարձակվեն մզկիթների վրա և կոտորեն մուսուլմաններին, այն դեպքում, երբ Դիարբեքիրում հայերը նման ուժ չունեին:

Հեղինակները պատմել են նաև հետագայում, հատկապես, 1980-ականներից հետո, հայերի հետքերը ջնջելու թուրքական քաղաքականության մասին:

Գրքում նշվում է, որ Ցեղասպանությունից հետո փրկված հայերի մեծ մասը եղել են մուսուլմանների հետ ամուսնացած կանայք և հարուստ հայերի երեխաներ, որոնց պահողները հույս են ունեցել, որ կտիրանան նրանց ունեցվածքին կամ կկարողանան փրկագին ստանալ: