Գյուղատնտեսական համակարգը չի կարող զարգանալ միայնակ, անհրաժեշտ է պետական աջակցություն. Արթուր Բաղդասարյան

Մարտի 27-ին «Կոնգրես» հյուրանոցում կայացավ «ՀՀ գյուղատնտեսության զարգացման խնդիրները պարենային անվտանգության համատեքստում» թեմայով խորհրդաժողով, որին մասնակցում Էին ՀՀ Ազգային անվտանգության խորհրդի քարտուղար Արթուր Բաղդասարյանը, հանրային խորհրդի նախագահ Վազգեն Մանուկյանը: Խորհրդաժողովի մասնակիցների թվում էին ՄԱԿ-ի հայաստանյան գրասենյակի մշտական համակարգող Դաֆինա Գերչևան, Համաշխարհային բանկի հայաստանյան գրասենյակի տնօրեն Ժան Միշել Հապպին, ՀՀ նախարարությունների, մարզպետարանների, ՀԿ-ների և ոլորտին առնչվող այլ կազմակերպությունների ներկայացուցիչներ:

Միջոցառմանը զեկուցումներով և ելույթներով հանդես եկան ՀՀ գյուղատնտեսության նախարար Սերգո Կարապետյանը՝ «Գյուղատնտեսության զարգացման խնդիրները պարենային անվտանգության համատեքստում», Դաֆինա Գերչևան՝ «ՄԱԿ-ի դերը պարենային անվտանգության ապահովման գործում», Ժան Միշել Հապպին՝ «Պարենային անվտանգության հիմնախնդիրները և վերջինիս լուծմանն ուղղված Համաշխարհային բանկի մոտեցումները», Արարատի մարզպետ Էդիկ Բարսեղյանը՝ «ՀՀ Արարատի մարզի դերը հանրապետության գյուղատնտեսության և պարենային անվտանգության ապահովման գործում», ՀՀ ԳՆ սննդամթերքի անվտանգության պետական ծառայության պետ Աբրամ Բախչագուլյանը՝ «Սննդամթերքի անվտանգությունը որպես պարենային անվտանգության կարևորագույն բաղադրիչ»:

Խորհրդակցության բացմանը ԱԱԽ քարտուղար Արթուր Բաղդասարյանը ասաց. «Գյուղատնտեսությունը այն ոլորտն է, որով կարող ենք մեր երկրի պարենային ինքնաբավության մակարդակը բարձրացնել»: Նա նշեց, որ այստեղ գլխավոր խնդիրն այն է, որ մեր երկրի ներմուծման ծավալները զգալիորեն գերազանցում են արտահանման ծավալներին:

«Գյուղատնտեսական համակարգը չի կարող զարգանալ միայնակ, անհրաժեշտ է պետական աջակցություն, որն էլ արդեն առկա է»,- հավելեց Արթուր Բաղդասարյանը:

Ազգային անվտանգության խորհրդի նախագահը առանձնացրեց այն հանգամանքը, որ պարենային անվտանգության խնդիր ունի ոչ միայն Հայաստանը, այլ ամբողջ աշխարհը: Այս առումով մեր երկիրը արդեն կարևոր քայլ է կատարել դեպի առաջ:

Անդրադառնալով պարենային անվտանգության հիմնախնդրի չափազանց կարևորությանն ու բարդությանը, ՀՀ գյուղատնտեսության նախարար Սերգո Կարապետյանը իր զեկուցման մեջ նշեց. «Պարենային անվտանգության հիմնախնդրի լուծմանն ուղղված միասնական, արդյունավետ և հիմնավորված քաղաքականության իրականացման անհրաժեշտությունից ելնելով՝ Ազգային անվտանգության խորհրդի համակարգմամբ, շահագրգիռ նախարարությունների, գերատեսչությունների մասնակցությամբ մշակվել է «Հայաստանի Հանրապետության պարենային անվտանգության հայեցակարգը», որը հաստատվել է Հայաստանի Հանրապետության Նախագահի 2011 թվականի մայիսի 18-ի կարգադրությամբ:

Հայեցակարգի հիմնական նպատակն է՝ ապահովել բնակչության բոլոր խմբերի համար առողջապահական նորմերին համապատասխանող սննդամթերքի ֆիզիկական ու տնտեսական մատչելիությունը, ինչպես նաև նախադրյալներ ստեղծել դիմակայելու սննդամթերքի ներքին և արտաքին շուկայի անբարենպաստ փոփոխություններին և հնարավոր արտակարգ իրավիճակների բացասական հետևանքներին»: