Հակոբ Հակոբյանը (Ճոյտ) օգտագործել է իր պաշտոնական դիրքը՝ իր իսկ բիզնեսների համար

Մարտի 27-ին «Ա1+»–ի «Պոստ Սկրիպտում» հաղորդման շրջանակներում Արամ Աբրահամյանի հյուրն էր ՀՀ ԱԺ պատգամավոր Հակոբ Հակոբյանը (Ճոյտ)։ Զրույցի հիմնական թեման մայիսի 6-ին կայանալիք խորհրդարանական ընտրություններում մեծամասնական ընտրակարգով վերջինիս առաջադրման հանգամանքն էր։ Զրույցը բավականին «բովանդակալից» և «հետաքրքիր» է ստացվել։

Արամ Աբրահամյանի՝ «Ձեր բիզնեսի համար երբեք չե՞ք դիմել որևէ պաշտոնյայի» հարցին ԱԺ պատգամավորը պատասխանում է՝ «Իհարկե դիմել եմ, իմ բիզնեսի համար դիմել եմ պաշտոնյաների, աջակցել են այն ժամանակ որպես դեպուտատի, այո՛»։ Փաստորեն, կարելի է եզրակացնել, որ Հակոբ Հակոբյանը օգտագործել է իր պաշտոնեական դիրքը՝ սեփական բիզնեսի հարցերը լուծելու նպատակով։ Բացի այդ, Հակոբ Հակոբյանը չի ժխտել, որ բիզնեսով է զբաղվել՝ խախտելով ՀՀ Սահմանադրության 65-րդ հոդվածը, որի համաձայն՝ պատգամավորը չի կարող զբաղվել ձեռնարկատիրական գործունեությամբ, զբաղեցնել պաշտոն պետական կամ տեղական ինքնակառավարման մարմիններում կամ առեւտրային կազմակերպություններում, կատարել այլ վճարովի աշխատանք, բացի գիտական, մանկավարժական եւ ստեղծագործական աշխատանքից:

«Դուք հիմա էլ ուզում եք, որ ձեր բիզնեսը մի քիչ զարգանա, դրա համար ե՞ք պատգամավոր ուզում դառնալ» հարցին ի պատասխան՝ Հակոբ Հակոբյանը ասում է. «Ո՛չ։ Հիմա ես ավելի շատ դրսում եմ բիզնես անում։ Իմ բիզնեսը փոքրացրել եմ շատ (միևնույն ժամանակ ձեռքի մատերով ցույց տալով թե ինչքան է փոքրացրել բիզնեսը)»։ Իսկ Աբրահամյանի՝ «հյուրանո՞ց ունեք» հարցին հետևում է զավեշտալի պատասխան՝ «դուք գիտեք՝ Հայաստանում այսօր բոլորն էլ հյուրանոց ունեն»։ Լուրեր.com–ը դեռ կանդրադառնա որոշ մանրամասների։

Կից ներկայացնում ենք հաղորդման տեսագրությունը։