«Հայկական ժամանակ». «Հ1»-ը կկազմակերպի Նիկոլ Փաշինյանի և Սամվել Ալեքսանյանի բանավեճը

«Հ1»-ի «Հարցազրույց» հաղորդաշարը խնդիր չի տեսնում թիվ 7 ընտրատարածքի պատգամավորի թեկնածուներ Նիկոլ Փաշինյանի և Սամվել Ալեքսանյանի բանավեճը կազմակերպելու հարցում. «Ես կփորձեմ, մեր մտքով էլ է անցել նման բան»:

Երեկ այս մասին հայտնել է հաղորդաշարի վարող Նվեր Մնացականյանը, երբ «ՀԺ»-ի  թղթակիցը հետաքրքրվել է, թե արդյոք մտադի՞ր են նման բանավեճ կազմակերպել: Մնացականյանը նաև հավելել է, որ դա ապրիլի մեջ, այսինքն՝ քարոզարշավի մեկնարկից հետո կարող են անել: Թերթի թղթակցի ճշտող հարցին, թե ո՞ր դեպքում է հնարավոր, որ այդ բանավեճը չկազմակերպեն, Մնացականյանն ասաց, որ իր իմանալով Ալեքսանյանը Հայաստանում չէ: Թղթակիցը տեղեկացրել է, որ նա խոստացել է եկող շաբաթ Հայաստան վերադառնալ: «Դե, եթե համաձայն են, այդտեղ մեծ խնդիր չկա: Նախընտրական ժամանակահատվածն ինչի՞ համար է՝ քաղաքական բանավեճերի և հանդիպումների»,- ասել է հաղորդավարը: Իսկ հնարավո՞ր է՝ հեռուստաընկերության ղեկավարությունը թույլ չտա:

 «Հեռուստաընկերության ղեկավարությունը երբևէ այդպիսի արգելքներ չի դրել: Չկա այդպիսի բան: Ուղղակի բանավեճերը Հայաստանում շատ դժվար են անցկացվում և կազմակերպվում՝ ինքներդ գիտեք»,- ասել է Մնացականյանը: